११ माघ, काठमाडौँ । विगतमा गाँजा खेती गर्ने बारा, पर्साका किसान सिँचाइ सुविधा पाएपछि तरकारी खेती र अन्य अन्न बाली उत्पादनमा क्रियाशिल भएका छन । सिँचाइ सुविधा भएपछि व्यावसायिक रुपमा लागुऔषध गाँजाखेती गर्ने किसान समेत अन्न बाली तथा तरकारी खेती गरी आर्थिक लाभ लिन आकर्षित भएका छन । नेपाल सरकारले भूमिगत जल विकास डिभिजन कार्यालय वीरगन्जमार्फत बाँझो जग्गामा वर्षैभरि सिँचाइ सुविधा उपलब्ध गराउने नीतिअनुरुप बारा, पर्सामा डिप ट्युवबेल तथा स्यालो ट्युवबेल जडान गर्न थालेपछि दुवै जिल्लाका हजाराँै बिगाहा क्षेत्रफलमा वर्षभरि सिँचाइ सुविधा उपलब्ध हुन थालेको छ ।
सिँचाइ सुविधा उपलब्ध भएपछि अन्न बाली तरकारी खेतीमा उल्लेखनीय उन्नती हुन थाल्दा छिमेकी मुलुक भारतमाथिको परनिर्भरता समेत घट्दै गएको किसानहरुले बताउँछन् । चालु आवमा सरकारले बारा जिल्लाका १८ वटा गाविसलाई लक्षित गरी २५० वटा स्यालो ट्युवबेल जडान गर्ने लक्ष्य लिएको छ । नेपाल सरकारको रु एक करोड २५ लाखको लागतमा निर्माण भइरहेका ती स्यालो ट्युवबेल निर्माण भएपछि त्यस भेगका एक हजार बिगाहा क्षेत्रफलमा सिँचाइ सुविधा उपलब्ध हुने विश्वास डिभिजन प्रमुख सुदर्शनप्रसाद अधिकारीले बताउनुभयो ।
त्यसबाट ७५० घर परिवार लाभान्वित हुनेछन् । यसैगरी, पर्सा जिल्लामा चालु आवमा २२५ वटा स्यालो ट्युवबेल जडान गर्ने कार्यक्रम सुरु भएको छ । रु एक करोड ६५ लाखको लागतमा निर्माण भइरहेको सो स्यालो ट्युवबेलबाट पर्सा जिल्लाका १६ वटा गाविसको करिब ९०० बिगाहा क्षेत्रफलमा सिँचाइ सुविधा उपलब्ध हुन जाने विश्वास लिइएको छ । त्यसबाट त्यस भेगका ६७५ घर परिवार सिँचाइ सुविधाबाट लाभान्वित हुनेछन् ।
प्रकाशित मिति: सोमबार, माघ १०, २०७३
