काठमाडौं । भदौ १० गते आएको बाढीले क्षति पुर्याएको एक सातापछि चीनले नेपालसँगको केरुङ सीमा नाका जोड्ने जी२१६ राष्ट्रिय राजमार्ग पूर्ण रूपमा सञ्चालनमा ल्याएको छ।
सिंगापुरको सीएनए समाचार संस्थाका अनुसार सडक सम्पर्क पुनःस्थापित भएसँगै मुख्य विपद् प्रभावित क्षेत्रमा पहिलोपटक ठूला तथा भारी मेसिन पुर्याउन सहज भएको छ।
भीर, भत्किने जोखिम रहेका डाँडा तथा तीव्र गतिमा बगिरहेको नदीको साँघुरो खोँचमा उद्धार टोलीले अहोरात्र काम गर्दै जी२१६ राजमार्गको आधार निर्माण गरी सडक सञ्चालनमा ल्याएका हुन्।
बुधबार सडक खुल्नुअघि हेलिकोप्टरमार्फत उद्धार सामग्री तथा उपकरण एयरड्रप गरिएको थियो। चिनियाँ सीमा भन्सार कम्प्लेक्स पुरिएको क्षेत्रमा दर्जनौँ एक्स्काभेटर तथा अन्य भारी मेसिन पुर्याइसकिएको छ।
पुरिएका व्यक्तिको खोजी गर्ने प्रविधि र तालिमप्राप्त कुकुरसहितका उद्धार टोलीलाई खोँच, नदी किनार तथा ध्वस्त पूर्वाधार क्षेत्रमा बेपत्ताको खोजीमा परिचालन गरिएको छ।
तिब्बत क्षेत्रमा हालसम्म १६ जनाको मृत्यु पुष्टि भएको छ भने २३ देशका २६१ विदेशी नागरिकसहित कुल ५४६ जना अझै बेपत्ता रहेको जनाइएको छ। नेपालमा भने बाढी तथा पहिरोका कारण मृत्यु हुनेको संख्या बुधबारसम्म १ हजार १०० नाघेको छ।
माथिल्लो तटीय क्षेत्रमा बनेका तालहरूको पानीको मात्रा घटेकाले फुट्ने जोखिम केही कम भए पनि खुकुलो भूभागका कारण थप पहिरो खस्ने जोखिम अझै कायमै रहेको चिनियाँ अधिकारीहरूले बताएका छन्।
