काठमाडौं । भोटेकोसी बाढीबाट प्रभावित क्षेत्रमा तीन स्थानमा बेलिब्रिज राख्ने प्रक्रिया सुरु भएको छ। थप २० स्थानमा बेलिब्रिज राख्न सम्भाव्यता अध्ययन भइरहेको सरकारले जनाएको छ।
बाढीले बगाएका तथा क्षति पुर्याएका पुलका स्थानमा तत्काल बेलिब्रिज राखेर यातायात सम्पर्क सुचारु गर्ने सरकारको तयारी छ। प्रधानमन्त्री वालेन्द्र (बालेन) शाहले सार्वजनिक गरेको क्षतिको विवरणअनुसार बाढी प्रभावित क्षेत्रमा ३१ वटा मोटरेबल पुल बगेका छन्।
तीमध्ये तीन स्थानमा बेलिब्रिज राख्ने प्रक्रिया अघि बढाइएको र थप २० स्थानमा सम्भाव्यता अध्ययन भइरहेको प्रधानमन्त्री शाहले उल्लेख गरेका छन्।
नेपालसँग ४८ मिटर लम्बाइका ६ वटा र ७० मिटर लम्बाइको एकवटा बेलिब्रिज रहेको छ। देवीघाटको तादी नदी, त्रिशूली बजार र बेत्रावती बजारमा बेलिब्रिज राख्ने विषयमा अध्ययन भइसकेको छ।
भारत सरकारले २३० फिट लामो सिंगल लेन मोडुलर स्टिल ब्रिज उपलब्ध गराएको छ भने थप सातवटा बेलिब्रिज पठाउने प्रतिबद्धता जनाएको छ। चीनले पनि छिट्टै ३० वटा बेलिब्रिज उपलब्ध गराउने प्रतिबद्धता जनाएको सरकारले जनाएको छ।
बाढीका कारण गल्छी–वेत्रावती–रसुवागढी सडक र पृथ्वी राजमार्गको गल्छी–मुग्लिन खण्डमा ठूलो क्षति पुगेको छ। गल्छी–वेत्रावती–रसुवागढी सडकको ८२ किलोमिटरमध्ये बिदुर–वेत्रावती–मैलुङ–स्याफ्रुबेसी–रसुवागढी खण्डको ४० किलोमिटर पूर्ण रूपमा र १६ किलोमिटर आंशिक रूपमा क्षतिग्रस्त भएको छ।
पृथ्वी राजमार्गको कृष्णभीर र परेवाभीर क्षेत्रमा समेत क्षति पुगेको छ। बाढीबाट ४८ वटा झोलुंगे पुलमा क्षति पुगेकोमा २० वटा मर्मत गर्न मिल्ने र २८ वटा नयाँ निर्माण गर्नुपर्ने अवस्था रहेको छ।
गल्छी–वेत्रावती सडकको गल्छी–देवीघाट खण्डमा लेदो हटाएर बेलिब्रिज निर्माणको काम अघि बढाइएको छ। तादी–देवीघाटमा बेलिब्रिज राख्ने तयारी तीव्र पारिएको छ भने बेत्रावतीमा नेपालसँग उपलब्ध बेलिब्रिज राख्न सम्भव देखिएपछि काम सुरु भइसकेको छ।
सडक विभागका अनुसार भोटेकोसी बाढीबाट सडक पूर्वाधारमा मात्रै करिब ३० अर्ब रुपैयाँ बराबरको क्षति पुगेको छ। क्षतिग्रस्त पूर्वाधार पुनर्निर्माणका लागि ५० अर्ब रुपैयाँभन्दा बढी खर्च हुने विभागको अनुमान छ।
प्रकाशित मिति: बुधबार, भदौ १७, २०८३
