कमन जेनजी नेपालले भदौ २३ गते काठमाडौंमा गर्ने भनिएको संघर्षका कार्यक्रम स्थगित गर्दै बाढीपीडितका लागि राहत सामग्री लिएर नुवाकोट पुगेको हो ।
कमन जेनजी नेपालका अध्यक्ष विकेश साहसहितको टोलीले अत्यावश्यक औषधि र खाद्यान्नसहित दुई गाडी राहत सामग्री लिएर मंगलबार नुवाकोट पुगेको जनाएको छ । टोलीले सम्भव भएसम्म रसुवासम्म पुगेर बाढी प्रभावितलाई राहत उपलब्ध गराउने तयारीसमेत गरेको छ ।
गत भदौ १० गते भोटेकोशी नदीमा आएको भीषण बाढीले रसुवा, नुवाकोटलगायत क्षेत्रमा ठूलो जनधनको क्षति पुर्याएको छ ।
बाढी आएको भोलिपल्टै नुवाकोट पुगेका जेनजी युवाहरू पुनः राहत सामग्रीसहित प्रभावित क्षेत्रमा पुगेका हुन् ।
अध्यक्ष साहले पूर्वनिर्धारित आन्दोलनका कार्यक्रम स्थगित गरेर अहिले बाढीपीडितको राहत तथा उद्धारमा केन्द्रित हुने निर्णय गरिएको बताए ।
“भदौ २३ गते काठमाडौंमा प्रदर्शन गर्ने निर्णय गरेका थियौँ । तर संघर्षका सम्पूर्ण कार्यक्रम स्थगित गरेर अहिले बाढीपीडितको राहत तथा उद्धारमा जुट्ने निर्णयअनुसार अत्यावश्यक औषधि र खाद्यान्न सामग्री लिएर नुवाकोट पुगेका छौँ,” साहले भने।
-1787133994.jpg)
