नवलपुर । भोटेकोशी नदीमा भदौ १० गते आएको बाढीपछि नारायणी नदीमा बगेर नवलपरासी (बर्दघाट–सुस्तापूर्व) मा भेटिएका २१६ शवमध्ये १५९ वटा व्यवस्थापन गरिएको छ ।
जिल्ला प्रहरी कार्यालय नवलपरासी (बर्दघाट–सुस्तापूर्व) का सूचना अधिकारी डीएसपी अनिल पण्डितका अनुसार पहिचान हुन नसकेका शव तथा मानव अंगलाई स्थानीय वन क्षेत्रमा जमिनमुनि गाडेर अस्थायी रूपमा व्यवस्थापन गरिएको हो ।
उनका अनुसार कावासोती नगरपालिकाको ज्योतिकुञ्ज सामुदायिक वन र देवचुली नगरपालिकाको दिव्य मध्यवर्ती सामुदायिक वनमा शव व्यवस्थापन गरिएको छ । व्यवस्थापन गरिएका शवमध्ये २९ महिला, ४७ पुरुष, सात बालक, सात बालिका तथा ६९ मानव अंग रहेका छन् ।
जिल्लामा हालसम्म ४७ महिला, ७३ पुरुष, ११ बालक र १५ बालिकाको शव तथा ७० वटा मानव अंग फेला परेको प्रहरीले जनाएको छ ।
फेला परेका शवमध्ये १७ वटा पहिचान गरी आफन्तलाई बुझाइएको छ । पहिचान खुलेका शवको आवश्यक प्रक्रिया पूरा गरी परिवारलाई हस्तान्तरण गरिएको पण्डितले बताए ।
अझै ४० शव तथा मानव अंग व्यवस्थापन गर्न बाँकी रहेको छ । बाँकीमध्ये १४ महिला, १४ पुरुष, तीन बालक, आठ बालिका र एउटा मानव अंग रहेको प्रहरीले जनाएको छ।
