काठमाडौं । रसुवाको भोटेकोशी हुँदै त्रिशूली नदीमा आएको विनाशकारी बाढीपछि प्रभावित रसुवा, नुवाकोट र धादिङमा उद्धार तथा राहत कार्य जारी छ ।
भदौ १० गते बिहान आएको बाढीले ठूलो जनधनको क्षति पुर्याएपछि नेपाली सेनासहित विभिन्न सुरक्षा निकाय तथा उद्धार टोली प्रभावित क्षेत्रमा परिचालन भएका छन् ।
मंगलबार बिहान ११ बजेसम्म नेपाली सेनाले २३ जनाको शव हेलिकप्टरमार्फत उद्धार गरेको जनाएको छ । त्यस्तै, विभिन्न जलविद्युत् आयोजनाका सुरुङमा फसेका तथा सम्पर्कविहीनको खोजी पनि तीव्र पारिएको छ ।
चिलिमे हाइड्रोको सुरुङमा विदेशी प्राविधिकसहितको संयुक्त खोज तथा उद्धार टोली करिब ५० मिटर भित्रसम्म पुगेर खोजी गरेको छ । लाङटाङ हाइड्रोमा टोली करिब १५० मिटर र अपर त्रिशूली–१ हाइड्रोमा करिब २०० मिटरसम्म सुरुङभित्र प्रवेश गरेर खोजी गरे पनि हालसम्म उद्धार हुन सकेको छैन ।
माथिल्लो त्रिशूली–३ ‘ए’ आयोजनामा टनेल हेड फेला पारेर कम्प्रेसरमार्फत हावा पठाउने काम भइरहेको छ । सुरुङभित्रको पानी निकाल्नुका साथै तीनवटा एक्साभेटर प्रयोग गरी पछाडितर्फ करिब १५ मिटर वैकल्पिक मार्ग खोलिएको छ । ढुंगा फुटाएर सुरुङभित्र प्रवेश गर्ने बाटो बनाउने काम पनि भइरहेको छ ।
त्यस्तै माथिल्लो त्रिशूली–३ ‘बी’ मा विज्ञसहितको सुरक्षाकर्मीको टोलीले सुरुङ प्रवेशद्वार पत्ता लगाएर एक्साभेटर प्रयोग गरी खन्ने काम गरिरहेको छ ।
बाढीपछि तत्काल उद्धारका क्रममा विभिन्न हाइड्रो क्षेत्रबाट २७९ जनाको जीवित उद्धार गरिएको थियो । जसमा रसुवागढीबाट २, माथिल्लो त्रिशूली–१ बाट ३३, माथिल्लो त्रिशूली–३ ‘ए’ बाट २२१, माथिल्लो त्रिशूली–३ ‘बी’ बाट २, मैलुङबाट ९, नुवाकोट सौर्य विद्युत् आयोजनाबाट ४, त्रिशूली जलविद्युत् आयोजनाबाट ३ र देवघाट जलविद्युत् आयोजनाबाट ५ जना रहेका छन् ।
नेपाली सेनाका अनुसार रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रसम्म ९ हजार २ सयभन्दा बढी सैनिक प्रत्यक्ष रूपमा परिचालन भएका छन् ।
सेनाले घाइते तथा बेपत्ताको खोज तथा उद्धार, शव व्यवस्थापनमा सहयोग, अवरुद्ध सडक सञ्चालन तथा आपत्कालीन उपचारलगायतका काम गरिरहेको जनाएको छ । प्रभावित क्षेत्रमा शव संकलनको कामसमेत जारी रहेको छ।
प्रकाशित मिति: मंगलबार, भदौ १६, २०८३
