काठमाडौं । नेपाली सेनाले बाढी प्रभावित क्षेत्रमा पैदल गस्ती सुरु गरेको छ । सर्वसाधारणको अवस्था बुझ्नुका साथै उद्धारको आवश्यकता पहिचान गर्न गस्ती सुरु गरिएको सेनाले जनाएको छ ।
सोमबार जारी विज्ञप्तिमा सेनाले प्रभावित क्षेत्रका जंगल, डाँडाकाँडा, खोला तथा बस्तीमा पैदल गस्ती गरी स्थानीयलाई सुरक्षा प्रत्याभूति दिलाउने र अवस्थाबारे जानकारी लिने कार्य भइरहेको जनाएको छ ।
गस्तीका क्रममा स्याफ्रुबेसी क्षेत्रमा राहत तथा राशन वितरण गर्नुका साथै लाङटाङ हाइड्रो क्षेत्रमा रेकी तथा गस्तीसमेत सञ्चालन गरिएको सेनाले जनाएको छ ।
नेपाली सेनाले स्थापना गरेको आपत्कालीन उपचार केन्द्र, त्रिशूली र धुन्चेबाट हालसम्म दुई हजार ६३२ जनाले स्वास्थ्य सेवा पाएका छन् ।
सेनाका अनुसार रसुवाको टिमुरेदेखि नुवाकोट, धादिङ, गोरखा, तनहुँ, चितवन, नवलपरासी पूर्व र नवलपरासी पश्चिमका प्रभावित क्षेत्रमा आठ हजार ९ सयभन्दा बढी सैनिक प्रत्यक्ष रूपमा परिचालन गरिएको छ ।
हालसम्म धुन्चेलगायत प्रभावित क्षेत्रमा करिब २३ हजार १९४ केजी राहत सामग्री हवाई माध्यमबाट ढुवानी गरिएको नेपाली सेनाले जनाएको छ ।
प्रकाशित मिति: सोमबार, भदौ १५, २०८३
-1787133994.jpg)