काठमाडौं । नेपाली ओडीआई क्रिकेट टोलीका कप्तान सन्दीप लामिछानेले विनाशकारी बाढीबाट प्रभावित नागरिकका लागि आफ्नो एक महिनाको तलब सहयोग गर्ने घोषणा गरेका छन्।
सन्दीपले क्रिकेट एसोसिएसन अफ नेपाल (क्यान) बाट प्राप्त हुने एक महिनाको पारिश्रमिक १ लाख ५० हजार रुपैयाँ प्रधानमन्त्री दैवी प्रकोप उद्धार कोषमा जम्मा गर्ने जानकारी दिएका हुन्।
एसीसी प्रिमियर कप खेल्न मलेसियामा रहेका सन्दीपले सामाजिक सञ्जालमार्फत आफूहरू देशबाट टाढा भए पनि मन भने नेपालमै रहेको बताएका छन्। उनले बाढीबाट प्रभावित नागरिकप्रति गहिरो सहानुभूति व्यक्त गर्दै प्रतियोगिताभर नेपालको प्रदर्शन प्रभावित नागरिकप्रति समर्पित गर्ने बताएका छन्।
यस्तै, एसीसी प्रिमियर कपमा नेपालले लिने हरेक विकेट र प्रहार गर्ने हरेक चौका तथा छक्काबापत १ हजार ५०० रुपैयाँका दरले बाढी प्रभावित बालबालिकाका लागि शैक्षिक सामग्री उपलब्ध गराउन सहयोग गर्ने प्रतिबद्धता पनि उनले जनाएका छन्।
“उनीहरूको सपना कुनै बाढीले बगाउन सक्दैन,” सन्दीपले भनेका छन्। उनले हरेक विकेट, हरेक बाउन्ड्री र हरेक हुटिङ नेपालकै लागि हुने उल्लेख गरेका छन्।
यसअघि नेपाल क्रिकेट संघ (क्यान) ले प्रधानमन्त्री दैवी प्रकोप उद्धार कोषमा ३० लाख रुपैयाँ सहयोग गर्ने घोषणा गरिसकेको छ।
नेपालले एसीसी प्रिमियर कपको समूह चरणमा बहराइन, साउदी अरेबिया, मलेसिया र हङकङसँग प्रतिस्पर्धा गर्नेछ।
प्रकाशित मिति: आइतबार, भदौ १४, २०८३
