काठमाडौं । चीनले रसुवा क्षेत्रमा बाढीको जोखिम अझै कायम रहेको संकेत गर्दै नेपाललाई आपत्कालीन प्रतिकार्यका लागि आवश्यक तयारी गर्न आग्रह गरेको छ।
काठमाडौंस्थित चिनियाँ दूतावासका प्रवक्ताले शुक्रबार वक्तव्य जारी गर्दै नेपाललाई उच्च सतर्कता अपनाउन आग्रह गरेका हुन्।
दूतावासका अनुसार हालैका दिनमा चीन–नेपाल सीमा नदीको माथिल्लो तटीय क्षेत्रमा पर्ने नेपाली भूभागको एक सहायक नदीमा हिम–पहिरो जाँदा नदी थुनिएर पहिरोजन्य ताल बनेको छ।
उक्त तालमा पानीको सतह उच्च विन्दुमा पुगेको र पानी ओभरफ्लो हुन थालेकाले ताल फुट्ने जोखिम बढेको चिनियाँ दूतावासले जनाएको छ।
“नेपाल र चीन दुवै देशका लागि उद्धार तथा आपत्कालीन प्रतिकार्यका दृष्टिले यो स्थिति हाल निकै संवेदनशील मोडमा छ,” दूतावासका प्रवक्ताले भनेका छन्।
दूतावासले पहिरोजन्य तालको तल्लो तटीय क्षेत्रमा रहेका स्थानीय समुदाय तथा सम्बन्धित कर्मचारीलाई नदीको पानीको सतहमा भइरहेको परिवर्तनलाई नजिकबाट निगरानी गर्न, उच्च सतर्कता अपनाउन तथा पूर्वतयारी र आपत्कालीन प्रतिकार्यका लागि आवश्यक व्यवस्था मिलाउन आग्रह गरेको छ।
चीन र नेपालका सम्बन्धित निकायले अवस्थाको निरन्तर अनुगमन गर्दै जोखिमको मूल्यांकन तथा व्यवस्थापन गरिरहेको दूतावासले जनाएको छ।
सर्वसाधारणलाई आधिकारिक सूचनामात्र पछ्याउन, पुष्टि नभएका खबर नफैलाउन तथा अनावश्यक त्रास सिर्जना नगर्न पनि चिनियाँ दूतावासले अनुरोध गरेको छ।
प्रकाशित मिति: शुक्रबार, भदौ १२, २०८३
