काठमाडौं । सरकारका प्रवक्ता तथा शिक्षा तथा खेलकुदमन्त्री सस्मित पोखरेलले बाढी तथा विपद्सम्बन्धी हल्ला र अफवाहबाट बच्न आग्रह गरेका छन्।
मन्त्री पोखरेलले विपद्सम्बन्धी आधिकारिक सूचना राष्ट्रिय विपद् जोखिम न्यूनीकरण तथा व्यवस्थापन प्राधिकरण र प्रधानमन्त्रीको आधिकारिक पेजबाट सार्वजनिक भइरहेको जानकारी दिए।
“राष्ट्रिय विपद् जोखिम न्यूनीकरण प्राधिकरणबाट जानकारी आइरहेको छ। प्रधानमन्त्री कार्यालयको पेजबाट पनि आइरहेको छ,” उनले भने, “आधिकारिक जानकारी मात्र लिनुहोला।”
उनले विपद्मा परेका नागरिकको उद्धार तथा राहतका लागि सहयोग गर्न चाहने व्यक्ति तथा संस्थालाई प्रधानमन्त्री राहत कोषमा मात्र रकम जम्मा गर्न आग्रह गरे।
“देश–विदेशबाट त्यसमा सहयोग गर्न खोज्नु भएको छ भने प्रधानमन्त्री राहत कोषमा मात्र जम्मा गरिदिनुहुन अनुरोध गर्दछु,” मन्त्री पोखरेलले भने।
प्रकाशित मिति: शुक्रबार, भदौ १२, २०८३
