काठमाडौं । रसुवामा बुधबार आएको भीषण बाढीमा फेला परेका शव सम्भव भएसम्म फेला परेकै स्थानबाट आफन्तलाई बुझाइने भएको छ ।
गृह मन्त्रालयका प्रवक्ता सहसचिव आनन्द काफ्लेका अनुसार शव पहिचान तथा हस्तान्तरणका लागि नेपाल प्रहरीको डीआईजी नेतृत्वको टोली परिचालन गरिएको छ । नेपाल रेडक्रस सोसाइटीले शव राख्न आवश्यक ब्यागको व्यवस्था गरेको छ ।
बाढी प्रभावित क्षेत्रमा गएर हालसम्म सम्पर्कमा नआएका व्यक्तिका आफन्तले आफ्नो जिल्लास्थित जिल्ला प्रहरी कार्यालयमा हुलियासहित निवेदन दिनुपर्ने केन्द्रीय प्रहरी प्रवक्ता डीआईजी अबिनारायण काफ्लेले बताएका छन् । विदेशी नागरिकका आफन्तले सम्बन्धित देशमा रहेको नेपाली दूतावास वा नेपालस्थित सम्बन्धित देशको दूतावासमा जानकारी गराउनुपर्नेछ ।
प्रहरी प्रधान कार्यालयले विभिन्न जिल्ला तथा विदेशबाट प्राप्त निवेदन र हुलिया संकलन गर्नेछ । यसका लागि डीआईजी सुदर्शनप्रसाद कोइरालाको संयोजकत्वमा आपत्कालीन समन्वय केन्द्र स्थापना गरिएको छ ।
केन्द्रले अस्पतालमा उपचाररत वा मृत्यु भएका व्यक्तिको हुलियाका आधारमा पहिचान गरी आफन्तसँग सम्पर्क गर्नेछ । पहिचान हुन नसकेका घाइते तथा मृतकको तस्बिर प्रहरीको वेबसाइटमा राख्ने तयारी भइरहेको प्रहरीले जनाएको छ ।
पहिचान खुलेपछि सम्बन्धित जिल्ला प्रहरी कार्यालयमा दाबी पेश गरी प्रक्रिया पूरा गरेर आफन्तले शव बुझ्न सक्ने व्यवस्था मिलाइएको छ । तत्काल सबै शव काठमाडौं ल्याउन प्राविधिक तथा व्यवस्थापनका दृष्टिले कठिन हुने भएकाले पहिचान भएका शव सम्भव भएसम्म फेला परेको स्थानबाटै आफन्तलाई बुझाइनेछ ।
पहिचान हुन नसकेका शव भने केही दिनपछि काठमाडौं ल्याएर एकै स्थानमा राखी आवश्यक प्रक्रिया पूरा गरेर हस्तान्तरण गरिने गृह मन्त्रालयले जनाएको छ ।
प्रकाशित मिति: बिहीबार, भदौ ११, २०८३
-1787133994.jpg)
-1787729040-1787822224.jpeg)
-1787729040-1787815274.jpeg)