काठमाडौं । रसुवाको भोटेकोशी नदीमा आएको भीषण बाढीका कारण नदी आसपासका क्षेत्रमा ठूलो क्षति पुगेको छ।
बाढीले नदी किनारका बस्ती तथा भौतिक संरचना बगाएको छ। स्थानीय जनप्रतिनिधिका अनुसार स्याफ्रुबेँसीदेखि तल भोटेकोशी नदी किनारमा रहेका विभिन्न संरचनामा क्षति पुगेको छ। मानवीय क्षतिको विवरण भने अहिलेसम्म प्राप्त भएको छैन।
बाढीपछि टिमुरे क्षेत्रमा सयौँ नागरिक उद्धारको पर्खाइमा रहेको स्थानीय जनप्रतिनिधिले बताएका छन्। उनीहरू डाँडामा आश्रय लिएर बसेका छन् भने खाद्यान्न तथा अन्य आवश्यक सामग्रीको समेत अभाव देखिएको छ।
नेपाली सेनाले हेलिकोप्टरमार्फत टिमुरेबाट ४ र स्याफ्रुबेँसीबाट ३ गरी ७ जनाको उद्धार गरेको छ। उद्धारका लागि सेनाका चार हेलिकोप्टर टिमुरे, स्याफ्रुबेँसी, मेलुङ र त्रिशूली क्षेत्रमा परिचालन गरिएका छन्।
बाढी धादिङको मलेखुसम्म पुगेको छ। नदी किनारका विभिन्न संरचनामा क्षति पुगेको स्थानीयले बताएका छन्। बाढीको जोखिमलाई मध्यनजर गर्दै नागढुङ्गा, खानीखोला र महादेवबेँसी क्षेत्रमा प्रहरीले सवारी आवागमनसमेत रोकेको छ।
यसैबीच, प्रधानमन्त्री वालेन्द्र शाहले उद्धार, राहत तथा थप सरकारी कदमबारे निर्णय गर्न मन्त्रिपरिषद्को आकस्मिक बैठक बोलाएका छन्। उद्धारका लागि निजी हेलिकोप्टर सञ्चालन गर्न छुट्टै अनुमति आवश्यक नपर्ने व्यवस्था पनि गरिएको छ।
प्रकाशित मिति: बुधबार, भदौ १०, २०८३
