काठमाडौं । रसुवाको भोटेकोशीमा आएको भीषण बाढीको सम्भावित कारणबारे चिनियाँ पक्ष नै हालसम्म अनविज्ञ रहेको विपद्विज्ञ वसन्तराज अधिकारीले बताएका छन्।
चीनको छेन्दुमा रहेका अधिकारीका अनुसार बाढी कुन ठाउँबाट सुरु भयो र यसको वास्तविक कारण के हो भन्ने अझै पत्ता लाग्न सकेको छैन।
“म अहिले चीनमा चिनियाँ साथीहरूसँगै छु। अहिलेसम्म यो बाढीको कारण के हो भन्ने मात्रै होइन, कहाँबाट बाढी सुरु भयो भन्ने पनि पत्ता लाग्न सकेको छैन,” उनले भने।
उक्त क्षेत्रमा सम्पर्क स्थापित हुन नसकेका कारण घटनाबारे थप सूचना प्राप्त गर्न कठिनाइ भइरहेको उनले बताए। बाढी कहाँबाट सुरु भयो र यसको कारण के हो भन्ने पहिचानका लागि चिनियाँ पक्षले प्रयास गरिरहेको तथा स्याटेलाइटमार्फत अध्ययन भइरहेको अधिकारीले जानकारी दिए।
बाढी सुरु भएको स्थान नै पहिचान नभएकाले कारण पनि यकिन हुन नसकेको उनको भनाइ छ। यद्यपि, प्रारम्भिक रूपमा हिमपहिरो गएर ठूलो बाढी आएको वा पहिरोका कारण ड्याम बनेर खोला फुटेको हुनसक्ने उनले बताए।
प्रकाशित मिति: बुधबार, भदौ १०, २०८३
