रसुवा । रसुवाको सीमावर्ती टिमुरे क्षेत्रमा बुधबार बिहान आएको आकस्मिक भीषण बाढीपछि ड्युटीमा खटिएका सशस्त्र प्रहरीका ९ जना सुरक्षाकर्मी सम्पर्कविहीन भएका छन्।
सशस्त्र प्रहरी बलका सहायक प्रवक्ता प्रहरी नायव उपरीक्षक शैलेन्द्र थापाका अनुसार टिमुरे बीओपीमा खटिएका ९ जना सशस्त्र प्रहरी बाढीपछि सम्पर्कविहीन भएका हुन्।
चीनको तिब्बततर्फबाट आएको ठूलो बाढी भोटेकोशी नदीमा मिसिएपछि टिमुरे बजार, रसुवा भन्सार क्षेत्र, सडक तथा आसपासका संरचनामा ठूलो क्षति पुगेको प्रारम्भिक विवरण छ। स्थानीय अधिकारीहरूका अनुसार बाढी बिहान करिब ९ बजे आएको हो।
बाढीका कारण टिमुरे बजारका धेरै घर तथा संरचना बगेका छन्। सञ्चार र सडक सम्पर्कसमेत प्रभावित भएपछि सम्पर्कविहीन सुरक्षाकर्मीको खोजी तथा उद्धारमा कठिनाइ भएको छ। सशस्त्र प्रहरी प्रधान कार्यालयले उनीहरूसँग सम्पर्क स्थापित गर्ने प्रयास भइरहेको जनाएको छ।
बाढीले रसुवा भन्सार क्षेत्र तथा त्यहाँ रहेका सवारीसाधन र सामानमा समेत क्षति पुर्याएको छ। टिमुरे–स्याफ्रुबेँसी सडकखण्डमा बाढी र पहिरोका कारण यातायात प्रभावित भएको छ। जलविद्युत् आयोजनाहरूमा समेत क्षति पुगेको प्रारम्भिक विवरण आएको छ।
बाढीबाट भएको मानवीय तथा भौतिक क्षतिको पूर्ण विवरण भने अझै प्राप्त हुन सकेको छैन। सुरक्षा निकाय र स्थानीय प्रशासन खोजी तथा उद्धार कार्यमा जुटेका छन्।
प्रकाशित मिति: बुधबार, भदौ १०, २०८३
