काठमाडौं । नेपाली कांग्रेसका पूर्वसभापति शेरबहादुर देउवा आगामी बिहीबार नेपाल फर्किने भएका छन्। हङकङबाट गत शुक्रबार थाइल्यान्डको बैंकक पुगेका देउवा साउन २८ गते काठमाडौं आइपुग्ने तयारीमा रहेको उनीनिकट स्रोतले जानकारी दिएको छ।
देउवासँगै विदेशमा रहेका उनकी पत्नी तथा पूर्वपरराष्ट्रमन्त्री आरजु राणा देउवा र छोरा जयवीर देउवा भने तत्काल नेपाल नफर्किने भएका छन्।
स्रोतका अनुसार देउवा यसअघि साउन २६ गते नै नेपाल आउने तयारीमा थिए। तर, विभिन्न कार्यक्रम तथा समय व्यवस्थापनका कारण उनको फर्किने कार्यक्रम दुई दिन पछाडि सारिएको हो।
नेपाली कांग्रेसभित्र असन्तुष्टि बढिरहेका बेला देउवा नेपाल फर्किन लागेका हुन्। कांग्रेसको असन्तुष्ट पक्षले साउन २९ देखि ३१ गतेसम्म काठमाडौंमा आयोजना गर्न लागेको भेलालाई समेत देउवाको आगमनसँग जोडेर हेरिएको छ।
पार्टीभित्र नेतृत्व, संगठन र पछिल्लो राजनीतिक अवस्थालाई लिएर बहस चलिरहेका बेला देउवाको नेपाल फिर्तीलाई कांग्रेसभित्र र बाहिर चासोका साथ हेरिएको छ।
प्रकाशित मिति: सोमबार, साउन २५, २०८३
