काठमाडौं । निर्वाचन आयोगले मतदाता नामावलीमा रहेका विवरण यथार्थ र अद्यावधिक बनाउन सम्बन्धित मतदातालाई आग्रह गरेको छ।
आयोगले आगामी असोज १ गते आफ्नो वेबसाइटमार्फत मतदाता नामावली प्रकाशन गर्ने जनाएको छ। उक्त नामावलीमा आफ्नो विवरण सही भए–नभएको जाँच गरी आवश्यक परे सच्याउन आयोगले आग्रह गरेको हो।
आयोगका प्रवक्ता नारायणप्रसाद भट्टराईले मतदाता नामावलीलाई यथार्थ र अद्यावधिक बनाउन सम्बन्धित मतदाताको समेत महत्वपूर्ण भूमिका रहने बताएका छन्। उनले आवश्यक सूचनासहित सम्बन्धित निर्वाचन कार्यालय वा अनलाइनमार्फत निवेदन दिई सहयोग गर्न आग्रह गरेका छन्।
आयोगका अनुसार मतदाता नामावलीमा आफ्नो नाम, थर, उमेर, ठेगाना लगायतका विवरणमा त्रुटि भएमा सच्याउन निवेदन दिन सकिनेछ। त्यस्तै, कसैले झुट्टा विवरण दिई मतदाता नामावलीमा नाम समावेश गरेको जानकारी भएमा आयोगलाई सूचना दिन भनिएको छ।
कुनै मतदाताको नाम एकभन्दा बढी स्थानमा समावेश भएको भए एक स्थानमा मात्र कायम गर्न पनि आयोगले आग्रह गरेको छ। त्यसैगरी, बसाइँसराइ वा विवाहका कारण स्थायी ठेगाना परिवर्तन भएको भए सोहीअनुसार मतदाता नामावलीमा ठेगाना अद्यावधिक गर्न आयोगले अनुरोध गरेको छ।
प्रकाशित मिति: शुक्रबार, भदौ ५, २०८३
-1768560081-1787310199.jpg)
-1787133994.jpg)
