काठमाडौं । बाराको जीतपुरसिमरा उपमहानगरपालिका–१ की तीन वर्षीया बालिका गरिमा चौधरीको बलात्कारपछि हत्या भएको घटनाको विरोधमा काठमाडौंको माइतीघरमा प्रदर्शन गरिएको छ।
अधिकारकर्मी तथा मृतक बालिकाका आफन्तले माइतीघरमा प्रदर्शन गर्दै गरिमा चौधरीका लागि न्यायको माग गरेका छन्। प्रदर्शनकारीले ‘गरिमा चौधरीलाई न्याय दे’, ‘महिला बालबालिका आयोग कहाँ छ ?’, ‘बलात्कारीलाई फाँसी दे’ लगायतका नारासहितका प्लेकार्ड बोकेका थिए।
घटनामा संलग्न रहेको आरोपमा प्रहरीले दुई जनालाई पक्राउ गरेको छ। पक्राउ पर्नेमा जीतपुरसिमरा–२ का १६ वर्षीय सुमन थापा र प्रोगेस चौधरी रहेका छन्।
प्रहरीका अनुसार गरिमा साउन ३१ गते बिहान करिब ८ः३० बजे घरबाट हराएकी थिइन्। उनको खोजी गर्ने क्रममा भदौ २ गते मंगलबार साँझ करिब ५ः४५ बजे भक्तिनगरस्थित वीरबहादुर रोकाको टायलले छाएको एकतले घरको खाली कोठामा बालिका मृत अवस्थामा फेला परेकी थिइन्।
सुरुमा मृतक बालिकाको नाम, थर र ठेगाना खुलेको थिएन। अनुसन्धानका क्रममा मृतक बालिका जीतपुरसिमरा–१ दसधुरी निवासी मनमती चौधरीकी तीन वर्षीया छोरी गरिमा चौधरी रहेको खुलेको प्रहरीले जनाएको छ।
घटनापछि प्रहरीले अनुसन्धान अघि बढाउँदै दुई जनालाई नियन्त्रणमा लिएको हो। प्रदर्शनकारीले घटनाको निष्पक्ष छानबिन गरी दोषीमाथि कडा कानुनी कारबाही गर्न माग गरेका छन्।
प्रकाशित मिति: शुक्रबार, भदौ ५, २०८३
-1768560081-1787310199.jpg)
-1787133994.jpg)
