काठमाडौं । बञ्चरेडाँडा ल्यान्डफिल साइट अव्यवस्थित भएपछि पूर्वाधार मन्त्रालयले प्रभावित क्षेत्रका स्थानीय जनप्रतिनिधिलाई सिंहदरबार बोलाएको छ।
मन्त्रालयका सिनियर डिभिजनल इन्जिनियर तथा वातावरण तथा परिसर सरसफाइ सम्पर्क व्यक्ति महेशबहादुर सिंहका अनुसार फोहोर व्यवस्थापनको विषयमा छलफल गर्न शुक्रबार दिउँसो १ बजे जनप्रतिनिधिलाई बोलाइएको हो।
बञ्चरेडाँडा ल्यान्डफिल साइट धादिङको धुनिवेशी नगरपालिका र नुवाकोटको ककनी गाउँपालिकाको सीमामा पर्छ। धुनिवेशी नगरपालिकाका प्रमुख बालकृष्ण आचार्यले पनि मन्त्रालयमा छलफलका लागि बोलाइएको पुष्टि गरेका छन्।
बञ्चरेडाँडामा विगत चार वर्षदेखि काठमाडौं उपत्यकासहित विभिन्न स्थानीय तहको फोहोर विसर्जन हुँदै आएको छ। तत्कालीन सहरी विकास मन्त्रालयले २० वर्षसम्म फोहोर व्यवस्थापन गर्ने लक्ष्यसहित १ अर्ब रुपैयाँभन्दा बढी लागतमा निर्माण गरेको ल्यान्डफिल साइट चार वर्षमै भरिएको छ।
हाल ल्यान्डफिल साइटमा फोहोरको ठूलो चुली बनेको छ भने लिच्चड बगेर खोलामा मिसिन थालेको छ। उपत्यकासहित २१ वटा स्थानीय तहको फोहोर व्यवस्थापन हुँदै आएको बञ्चरेडाँडाको अवस्थालाई लिएर स्थानीयले फोहोर व्यवस्थापन व्यवस्थित गर्न तथा मानव बस्ती र फोहोरलाई सुरक्षित रूपमा अलग राख्न माग गर्दै आएका छन्।
प्रकाशित मिति: शुक्रबार, भदौ ५, २०८३
-1768560081-1787310199.jpg)
-1787133994.jpg)
