२५ साउन, काठमाडौं । प्रमुख प्रतिपक्षी दल नेपाली कांग्रेसले प्रधानमन्त्री बालेन शाहलाई रुलिङ गरेर संसद्मा उपस्थित भई उठेका प्रश्नहरूको जवाफ दिन बोलाउन सभामुख डोलप्रसाद अर्यालसमक्ष माग गरेको छ ।
सोमबार प्रतिनिधिसभा बैठकमा बोल्दै कांग्रेस सांसद रेनुका काउचाले संसद्मा उठेका प्रश्नहरूको जवाफ आवश्यक रहेको बताउँदै सभामुखलाई प्रधानमन्त्रीलाई रुलिङमार्फत सदनमा बोलाउन आग्रह गरिन् । उनले आफूहरूले घेराबन्दी गर्न नभई जवाफदेही बनाउन खोजेको स्पष्ट पारिन् ।
‘सभामुखसमक्ष आग्रह गर्न चाहन्छु, सम्माननीय प्रधानमन्त्रीज्यूलाई रुलिङ गरेर सदनमा जवाफ दिन बोलाउनुहोस्,’ उनले भनिन्, ‘हामी तपाईंलाई घेराबन्दी गर्न होइन, जवाफदेही बनाउन चाहन्छौं । हामी सभामुख र प्रधानमन्त्री पदको गरिमा बचाउन खोजिरहेका छौं । हामी सरकारलाई सफल बनाउन खोजिरहेका छौं ।’
उनले प्रधानमन्त्री शाह एक्लै नभएको उल्लेख गर्दै मुलुकको हितमा अघि बढ्न आग्रह गरिन् र प्रतिपक्ष सधैं साथमा रहने प्रतिबद्धता जनाइन् । साथै, संविधानभन्दा माथि कोही नरहेको र संसद् नै सबैभन्दा ठूलो राजनीतिक मञ्च भएको उल्लेख गरिन् ।
काउचाले दैनिक संसद्मा उठिरहेका सीमासम्बन्धी प्रश्नहरूको जवाफ प्रधानमन्त्रीले अनिवार्य रूपमा दिनुपर्ने बताइन् ।
प्रकाशित मिति: सोमबार, साउन २५, २०८३
