७ चैत, नुवाकोट । नुवाकोटको खडग भञ्ज्याङ गाविस–९ निवासी ९० बर्षीया बृद्ध सुकमाया आइतवार निकै खुसी देखिइन । लामो समयदेखि अप्ठ्यारो महसुस गरिरहेकी बृद्धा आफ्नो गाउँमै महिला रोग सम्बन्धी निशुल्क स्वास्थ्य सिविर तथा औषधी बितरण भएपछि उनमा खसी छाएको हो । हिडन समेत नसक्ने उनी लौरो टेकेरै शिविर भइरहेको स्थान बुद्धसिंङ घाटस्थित बिद्यालय प्रांगनमा पुगेकी थिइन । आफन्तको साहारामा आएकी उनलाई गाइनोलोजिष्ट डा. बालगोबिन्द चौधरीले महिला स्वास्थ्यसम्बन्धी उपचार गर्नुका साथै निशुल्क औषधी बितरण गरेका हुन । ‘अस्पतालसम्म जानसक्ने अवस्था थिएन, गाउँमै स्वास्थ्य शिविर सञ्चालन भएपछि उपचार पाइयो,’ उनले भनिन ।
गाउँमा सवैबाट हजुरआमाको उपमा पाएकी उनले निशुल्क स्वास्थ्य शिविर र औषधी बितरण गर्ने संस्थालाई पनि सदै यस्तै काम गर्नु भन्दै आशिर्वाद दिइन । गाउँमा उपचार पाउन नसकेको र महिला तथा पुरुषमा प्रजनन स्वास्थ्यको बिषयमा निकै कम ज्ञान भएको सुचनाको आधारमा नेपाली महिलाहरुको आवाज नामक संस्थाले आइतवार खडग भञ्ज्याङमा निशुल्क स्वास्थ्य शिविर तथा औषधी बितरण कार्यक्रम गरेको थियो । शिविरबाट ४ सय २१ जना लाभान्वित भएको संस्थाकी अध्यक्ष सुमित्रा थापाले जानकारी दिइन । ‘उपचार पाउन नसकेका र उपचार गर्न नसक्ने महिलाहरुलाई लक्षित गरी आयोजना गरिएको शिविरबाट अत्यन्त उत्साहित भएका छौं, हामीले सोचे भन्दा बढीले शिविरबाट सेवा पाउनु भयो,’ थापाले भनिन ।
अध्यक्ष थापाका उनका अनुसार अधिकांश महिलाहरुले प्रजनन स्वास्थ्यबारे जानकारी लिएका छन भने परीक्षणपछि आवश्यक औषधीसमेत निशुल्क दिइएको छ । उपचारका लागि आएका सवैलाई प्रसुती गृहका चिकित्सक चौधरीले परामर्शसहित उपचार गरेका थिए । शिविरका लागि मिडवाइ फ्रि सोसाइटी अफ नेपालले निशुल्क औषधी सहयोग गरेको अध्यक्ष थापाले जानकारी दिइन । उपचारका लागि आएका स्थानीयबासीले पुनः यस्तो कार्यक्रम लिएर आउन आयोजकहरुलाई आग्रह गरेका थिए ।
प्रकाशित मिति: आइतबार, चैत ६, २०७३
