रियो दि जेनेरियो । ब्राजिलमा मृत्यु भइसकेकी एक महिलाको पाठेघर प्रत्यारोपरण गरेकी एक महिलाले बच्चा जन्माएकी छन् ।
सन् २०१६ मा ब्राजिलको साओ पाउलोमा करिब १० घन्टा लगाएर पाठेघर प्रत्यारोपण गरिएको थियो र पछि गर्भाधानसम्बन्धि उपचार गरिएको थियो ।
पाठेघर प्रत्यारोपणपछि आमा बनेकी ती ३२ वर्षीया महिला पाठेघर बिनै जन्मिएकी थिइन् ।
जीवित महिलाले नै दान गरेका पाठेघर प्रयोग गर्दै ३९ वटा पाठेघरहरू प्रत्यारोपण गरिसकिएको छ । जसमा छोरीलाई आफ्नो पाठेघर दिने आमाहरू समेत रहेका छन् ।
यसरी प्रत्यारोपण गरिएका पाठेघरको सहायतामा ११ जना शिशुको जन्म भइसकेको छ ।
तर मृत्यु भइसकेका दाताहरूको पाठेघर प्रत्यारोपण गर्ने यसअघिका १० वटा प्रयासहरू भने केही असफल भएका थिए भने केही गर्भ तुहिएका थिए ।
यस पटकको पाठेघर दाता ४० वर्षको हाराहारीमा रहेकी तीन छोराछोरीकी आमा थिइन् । जसको मस्तिष्कमा रगत बगेका कारण मृत्यु भएको थियो ।
पाठेघर प्रत्यारोपण गरिएकी महिला प्रत्येक ४ हजार ५ सय महिलामध्ये एक जनामा देखिने एकप्रकारको सिन्ड्रोमबाट ग्रस्त थिइन् । त्यस्तो अवस्थामा महिलाको योनी र पाठेघर राम्रोसँग विकसित हुँदैन ।
तर उनको डिम्बाशयमा कुनै समस्या थिएन । त्यसैले चिकित्सकहरूले उनको डिम्ब सफलतापूर्वक निकाल्न सफल भएका थिए र पुरुषको वीर्यसँग गर्भाधान गराई चिस्यानमा राखेका थिए ।
ती महिलालाई त्यस्ता औषधिहरू दिइएको थियो जसले उनको रोगप्रतिरोधी प्रणालीलाई कमजोर पार्दथ्यो । उनको शरीरलाई पाठेघरको प्रत्यारोपण स्वीकार गराउनका लागि त्यसको गरिएको थियो ।
त्यसको झण्डै ६ सातापछि उनको महिनावारी हुन सुरू भयो । सात महिनापछि गर्भाधान गराइएका ती डिम्बहरू उनको पाठेघरमा राखिएको थियो ।
साओ पाउलोस्थित एउटा अस्पतालका डा.डेनी आइजेनबर्गले भने, ‘जीवित दाताहरूबाट गरिएका सुरूवाती पाठेघर प्रत्यारोपणहरू चिकित्सा क्षेत्रका लागि कोसेढुङ्गा थिए । यस्ता प्रत्यारोपणहरूले उपयुक्त दाताहरूसँगको पहुँच तथा आवश्यक स्वास्थ्य सुविधाहरू प्रदान गर्दै बाँझोपन भएका धेरै महिलाहरूलाई आमा बन्न सक्ने सम्भावनाहरूको सिर्जना गरिदिएको छ ।’
प्रकाशित मिति: मंगलबार, मंसिर १८, २०७५
-1732776560.jpg)
