२५ फागुन, काठमाडौँ । बुधबार बसेको मन्त्रिपरिषद् बैठकमा नेकपा एमालेको मेची–महाकाली अभियानलाई रोक लगाउनु पर्ने विषयमा कुरा उठेको छ । बैठकमा गृहमन्त्री बिमलेन्द्र निधीले एमालेको मेची महाकाली अभियानमा रोक लगाउनु पर्ने प्रस्ताव गर्नुभएको नेपाली कांग्रेसकै तर्फबाट सरकार रहनु भएका अर्का एक मन्त्रीले जनाकारी दिनुभयो । एमालेको मेची महाकाली अभियानको विरोधमा प्रदर्शनमा उत्रिएका चार जनाको प्रहरीको गोली लागेर सप्तरीमा ज्यान गएपछि मन्त्रिपरिषद्मा बुधबार छलफल भएको छ । छलफलमा भाग लिँदै गृहमन्त्री निधीले विकसित घटनाक्रमले अभियानमाथि रोक लगाउनु पर्ने अवस्था सिर्जना आएको बताएको बुझिएको छ । प्रधानमन्त्री पुष्पकमल दाहाल प्रचण्डले अभियान रोक्न गरेको आग्रहलाई एमालेले अस्वीकार गरेको भन्दै अन्य केही मन्त्रीले सरकारले नै अभियानमा रोक लगाउनु पर्ने माग गरेका थिए ।
प्रकाशित मिति: मंगलबार, फागुन २४, २०७३
