–राजन रौनियार
२३ फागुन, पर्सा । नेकपा एमालेको मेची महाकाली अभियान बिथोल्न पुगेका मधेसी मोर्चाका कार्यकर्ता र प्रहरीबिच झडप हुँदा तीन जनाको ज्यान गएको छ । अरु २०–२२ जना घाइते भएका छन् । सप्तरीको गजेन्द्रनारायण सिंह औद्योगिक क्षेत्रमा भएको सभा सकेर एमाले नेताहरु हिँडेपछि झडप भएको थियो । त्यस क्रममा स्थितिलाई नियन्त्रणमा लिन हवाई फायर गर्नु परेको प्रहरीले जनाएको छ । मृत्यु हुनेमा मलेठ-४ का २० वर्षीय सञ्जय मेहता, लिमनका दिगम्बर झा र मलेठ ४ का पिताम्बर मण्डलको मृत्यु भएको छ । गोली लागेर गम्भीर घाइते भएका झाको धरानस्थित वीपी कोइराला स्वास्थ्य विज्ञान प्रतिष्ठान लैजाने क्रममा बाटैमा मृत्यु भएको थियो । मण्डलको भने धरान पुर्याए लगतै निधन भएको छ । अस्पतालले दुबैको निधनको पुष्टि गरेको छ ।
सभास्थल बाहिर मोर्चाका कायर्कर्ताले दिनभरी नै प्रदर्शन गरे पनि प्रहरीले उनीहरुलाई सभास्थलमा प्रवेश गर्न रोकेको थियो । तर एमालेको सभा सकिए लगत्तै प्रदर्शनरत मोर्चाका कार्यकर्ताले प्रहरीलाई नै ढुंगामुढा गरेका थिए । मेची महाकाली अभियानको तेश्रो दिन आज एमाले नेताहरु सुनसरीको इनरुवामा भएको कार्यक्रममा सहभागी भएर राजविराज आइपुगेका थिए । राजविराजमा भएको कार्यक्रमलाई संवोधन गरेपछि एमाले नेताहरुसहितको जुलुश सप्तरीकै कञ्चनपुरतिर लागेको छ । तर राजविराजमा भने प्रदर्शन जारी छ ।
प्रकाशित मिति: आइतबार, फागुन २२, २०७३
