काठमाडौं । राष्ट्रपतिले नाटकीय रुपमा पूर्व राष्ट्रपति महिंदा राजपाक्षलाई प्रधानमन्त्री पदमा नियुक्त गरेपछि श्रीलंकामा संवैधानिक संकट चुलिने देखिएको छ ।
राष्ट्रपति मैत्रीपाला सिरीसेनाको कार्यलयद्वारा शुक्रबार जारी विज्ञप्तिमा राजपाक्षलाई प्रधानमन्त्री पदमा नियुक्त गरिएको उल्लेख छ । उता वर्तमान प्रधानमन्त्री रानिल विक्रमासिंङ्गेले आफू संसदको बहुमत प्राप्त प्रधानमन्त्री भएकाले बहुमत रहेसम्म प्रधानमन्त्री पदमै रहने दाबी गरेका छन् ।
आफ्नै पार्टी गठबन्धन यूनाइटेड पिपुल्स फ्रिडम अलायन्स यूपीएफएले सरकार छोड्ने निर्णय गरे लगत्तै राष्ट्रपति सिरिसेनाले पछिल्लो घोषणा गरेको देखिन्छ । त्यस्तै मन्त्रीपरिषदका प्रवक्ता एवं मन्त्री रायठा सेनारत्नेले पनि रानिल विक्रमासिंङ्गे नै प्रधानमन्त्री रहेको बताएका छन् ।
उता राजपाक्षेले आफ्नो माइक्रो ब्लगिङ साइटमा आफ्नो परिचय परिवर्तन गरि आफूलाई प्रधानमन्त्री भनी उल्लेख गरिसकेको बिबिसीले जनाएको छ । जब कि विक्रमासंघेको परिचय पनि प्रधानमन्त्री भनेरै उल्लेख गरीएको यथावत नै छ ।
गत निवार्चनमा राजपाक्षेलाई वर्तमान राष्ट्रपति सिरीसेनाले नै पराजित गरेका थिए । सरकारमा रहेका यूएनपीका मन्त्री मंगला समरवीराले ट्वीट गर्दै राजपाक्षेलाई प्रधानमन्त्रीमा नियुक्त गर्नु असंवैधानिक र गैरकानूनी एवं लोकतन्त्र विरोधी भएको बताएका छन् ।
राष्ट्रपतिले आफ्ना कट्टर विरोधी नै सरकारको प्रधानमन्त्रीमा नियुक्त गरेको यो घटनालाई आश्चर्यजनक मानिएको छ । राष्ट्रपति सिरीसेनाले हाल विक्रमासिंङ्गेको यूनाइटेड नेशनल पार्टी यूएनपीसँग मिलेर सरकार चलाई रहेका थिए ।
आर्थिक नीति र प्रशासनिक कामकाजलाई लिएर पछिल्लो समय सिरीसेना र विक्रमासिंङ्गेबीच रस्साकस्सी चलिरहेको थियो ।
प्रकाशित मिति: शुक्रबार, कात्तिक ९, २०७५
-1732776560.jpg)
