१६ फागुन, काठमाडौँ । एकसय सातौँ अन्तर्राष्ट्रिय महिला दिवसलाई देशभर भव्यरुपमा मनाउन सञ्चार क्षेत्रमार्फत व्यापक प्रचारप्रसार गरिने भएको छ । सूचना तथा सञ्चार मन्त्रालयका सहसचिव रामचन्द्र ढकालको संयोजकत्वमा आइतबार सिंहदरबारमा बसेको प्रचारप्रसार समितिको बैठकले दिवसलाई भव्यरुपमा मनाउन सञ्चार माध्यमको अत्यधिक प्रयोग गर्ने निर्णय गरेको हो । बैठकले पत्रपत्रिका, अनलाइन, रेडियो, टेलिभिजनलाई सशक्त ढङ्गले दिवसको प्रचारप्रसार गर्न निर्देशनसमेत दिएको छ ।
महिला बालबालिका तथा समाज कल्याण मन्त्रालयका सहसचिव राधिका अर्यालले दिवसलाई भव्य बनाउन प्रचारप्रसारको खाँचो रहेको भन्दै सूचना प्रकाशन तथा सम्प्रेषणका लागि सञ्चारमाध्यमलाई आग्रह गर्नुभयो । रेडियो नेपालका नायब कार्यकारी निर्देशक श्रीभद्र वाग्लेले दिवसका अवसरमा समाचार दिनुका साथै अन्तर्वार्तालाई रेडियो नेपालले प्राथमिकताका साथ प्रसारण गर्ने बताउनुभयो ।
नेपाल टेलिभिजनका कार्यक्रम निर्देशक दीपा गौतमले महिला हक अधिकारका लागि टेलिभिजनले आवाज उठाउँदै आएको बताउँदै आगामी दिनमा पनि प्रभावकारी भूमिका खेल्ने बताउनुभयो । ‘महिला सम्मानको आधार, सीपयुक्त हात र स्वरोजगार’ भन्ने मुलनाराका साथ यही फागुन २५ गते १०७ औँ अन्तर्राष्ट्रिय महिला दिवस मनाइँदैछ । दिवसअन्तर्गत फागुन २५ गते बिहान ७ः३० गते पदयात्रा र बिहान १० वजे औपचारिक कार्यक्रम गरिने मन्त्रालयले जनाएको छ ।
यस्तै, जबर्जस्ती करणीको अभियोगमा आज जिल्ला अदालतले एक जनालाई पुर्पक्षका लागि कारागार चलान गरेको छ । विराटनगर–५ बस्ने ५१ वर्षीय आशाराम माझीले १५ वर्षीया एक किशोरीलाई जबर्जस्ती करणी गरेको अभियोगमा प्रहरीले पक्राउ गरी उनीमाथि करणीको मुद्दा दर्ता गरेको थियो ।
प्रकाशित मिति: आइतबार, फागुन १५, २०७३
