काबुल । अफगानिस्तानको पूर्वी सहर जलालाबादस्थित सेभ द चिल्ड्रेनको कार्यालयमा आतंकवादी हमला भएको छ । सो आक्रमणमा परी कम्तीमा पनि दुई जनाको मृत्यु भएको छ भने अन्य १२ जना घाइते भएका छन् । अन्य दुई जना आक्रमणकारीसमेत मारिएको बताइएको छ ।
बुधबार सो कार्यालयमा आक्रमण भएको समयमा ५० जना कर्मचारी काम गरिरहेका थिए । सो आक्रमणमा कम्तीमा पनि तीन जना बन्दुकधारी संलग्न रहेको बताइएको छ । आक्रमणपछि केही समयसम्म बन्दुकधारी र सुरक्षाकर्मीबीच दोहोरो गोली हानाहान भएको थियो । चरमपन्थी संगठन इस्लामिक स्टेट (आईएस) ले सो आक्रमणमा आफ्नो संलग्नता रहेको दाबी गरेको छ ।
बुधबार बिहान स्थानीय समयअनुसार ९ बजेर १० मिनेटमा आतंकवादीले सेभ द चिल्ड्रेनको कार्यालयमा कार बम विस्फोट गराएको नान्गाहर प्रान्तीय सरकारका प्रवक्ता अत्ताउल्लाह खोग्यानीले जानकारी दिएका छन् । विस्फोटपछि सो कार्यालय परिसरमा विस्फोट गराएपछि धुवाँको कालो मुस्लो आएको देखिएको थियो ।
आक्रमणकारीको प्रतिकारका लागि प्रहरीसँगै अफगान कमान्डोसमेत परिचालित गरिएको थियो । जलालाबादमा सेभ द चिल्ड्रेनसँगै अन्य केही सहायता संस्थाका कार्यालयसमेत रहेका छन् । आईएस निकट समाचार एजेन्सी अमाकले तीन जना आक्रमणकारीले शक्तिशाली कार बम विस्फोटसँगै बेलायती, स्विडिस र अफगान संस्थाहरूलाई निशाना बनाएको उल्लेख गरेको छ ।
अफगानिस्तानको जलालाबादमा सन् २०१५ देखि नै आईएसका लडाकुहरू सक्रिय रहेका छन् । यसअघि सो आक्रमणमा तालिवानको संलग्ना रहेको अनुमान गरिए पनि सो संगठनले आक्रमणमा आफ्नो संलग्नता अस्वीकार गरेको छ । गत शनिबार राति मात्रै अफगानिस्तानमा रहेको एउटा सुविधासम्पन्न होटललाई आतंकवादीले कब्जामा लिएर गरेको आक्रमणमा परी १४ जना विदेशी पर्यटकसहित २२ जनाको मृत्यु भएको थियो ।
सो आक्रमणपछि सेभ द चिल्ड्रेनले विज्ञप्ति जारी गर्दै आफूहरूको सबैभन्दा पहिलो प्राथमिकता त्यहाँ कार्यरत कर्मचारीहरूको सुरक्षा रहेको बताएको छ । उसले आफूहरू आफ्ना कर्मचारीको थप जानकारी पर्खिरहेको बताएको छ ।
अफगानिस्तानस्थित राष्ट्रसंघीय मिसनले यो आक्रमण सर्वसाधारण र सहयोग संस्थाप्रति लक्षित रहेको भन्दै यो अन्तर्राष्ट्रिय मानवीय कानुनको ठाडो उल्लंघन र युद्ध अपराध भएको बताएको छ । सेभ द चिल्ड्रेनले सन् १९७६ देखि अफगानिस्तानमा काम गर्दै आएको छ । हाल यो संस्थाले अफगानिस्तानका विभिन्न १६ प्रान्तमा यस्ता कार्यक्रम सञ्चालन गर्दै ७ लाखभन्दा बढी बालबालिकालाई सेवा पु¥याइरहेको छ । अफगानिस्तानमा अमेरिका नेतृत्वमा आक्रमण गरिएदेखि नै पश्चिमा सहयोग संस्थामाथि निरन्तर आक्रमण हुँदै आएको छ । आक्रमणका बाबजुद पनि यस्ता संस्थाले काम गरिरहेका छन् । गत वर्ष भएको आतंकवादी आक्रमणमा रेडक्रसका सात जना कर्मचारी मारिएका थिए भने सन् २०१५ मा कुन्दुज प्रान्तमा भएको आक्रमणमा परी २२ जनाको मृत्यु भएको थियो । एजेन्सी
प्रकाशित मिति: मंगलबार, माघ ९, २०७४
-1732776560.jpg)
