कञ्चनपुर । भारतको उत्तराखण्डस्थित धौलीगंगा जलविद्युत् आयोजनाको बाँधका ढोका ४८ घण्टाका लागि खोलिने भएका छन् ।
आयोजनाको बाँधमा रहेको सिल्ट सफाइ गर्न असोज १७ गते शनिबार राति १ बजेदेखि असोज १९ गते सोमबार राति १ बजेसम्म बाँधका ढोका खोलिने जिल्ला प्रशासन कार्यालय कञ्चनपुरले जनाएको छ ।
बाँधका ढोका खोलिएपछि महाकाली नदीमा जलस्तर बढ्न सक्ने भन्दै नदी तटीय क्षेत्रका बासिन्दालाई प्रशासनले सतर्क रहन आग्रह गरेको छ ।
महाकाली नदी किनारमा बसोबास गर्ने तथा नदीमा आवतजावत गर्ने नागरिकलाई पूर्वसतर्कता अपनाउन प्रशासनले अनुरोध गरेको हो ।
बाँध खोलिएको अवधिमा नदीमा नजान, नदी किनारमा नबस्न तथा सम्भावित जोखिमबाट सुरक्षित रहन प्रशासनले आग्रह गरेको छ ।
बाँधका ढोका बन्द गरिएपछि पनि केही समय महाकाली नदीको जलस्तर बढ्न सक्ने सम्भावना रहेकाले तटीय क्षेत्रका बासिन्दालाई सतर्क रहन प्रशासनले जनाएको छ ।
प्रकाशित मिति: शुक्रबार, असोज १६, २०८३
