गोरखा । मनाङको नार्पाभूमि गाउँपालिका–५ स्थित हिमलुङ आधार शिविरमा हिमपहिरोमा परी मृत्यु भएका गोरखाका वीरेन्द्र गुरुङको शव आफन्तलाई बुझाइएको छ ।
धार्चे गाउँपालिका–२ केरौंजाका ३२ वर्षीय गुरुङको शव हेलिकोप्टरबाट गाउँ ल्याएर आफन्तलाई बुझाइएको स्थानीय अर्जुन गुरुङले जानकारी दिए ।
हिमालयन होलिडेज कम्पनीका तर्फबाट आरोहीका सहयोगीका रूपमा हिमलुङ बेसक्याम्प पुगेका गुरुङ गत आइतबार हिमपहिरोमा परी बेपत्ता भएका थिए । उनको शव सोमबार भेटिएको थियो ।
यस्तै, हिमपहिरोमा परी बेपत्ता भएका अर्का ४५ वर्षीय आशबहादुर गुरुङको शव बुधबार दिउँसो भेटिएको छ । उनको शव काठमाडौं ल्याउने तयारी भइरहेको छ ।
वीरेन्द्र गुरुङ हिमालयन होलिडेज कम्पनीका बेसक्याम्प सहयोगीका रूपमा हिमलुङ पुगेका थिए भने आशबहादुर गुरुङ इम्याजिन नेपाल एक्सपिडिशन प्रालिबाट गाइड तथा कुकम्यानका रूपमा त्यहाँ पुगेका थिए ।
प्रकाशित मिति: बिहीबार, असोज १५, २०८३
-1790834313.jpg)