धादिङ । लगातारको वर्षासँगै पृथ्वी राजमार्गअन्तर्गत धादिङका विभिन्न स्थानमा पहिरो खसेपछि यातायात प्रभावित भएको छ । अधिकांश स्थानमा पहिरो पन्छाएर एकतर्फी यातायात सञ्चालनमा ल्याइए पनि केही ठाउँमा अवरोध हटाउने काम जारी छ ।
नागढुंगा–मुग्लिन सडक आयोजना पश्चिम खण्डकी प्रमुख सञ्जना अधिकारीका अनुसार बेनीघाट रोराङ गाउँपालिका–१० स्थित पानीधारामा ठूलो पहिरो खसेपछि केही समय राजमार्ग दुवैतर्फ अवरुद्ध भएको थियो । अहिले पहिरो पन्छाएर सडक सञ्चालनमा ल्याइएको छ ।
कृष्णभीरलगायतका स्थानमा पनि एकतर्फी यातायात सञ्चालनमा ल्याएर रोकिएका सवारीसाधनलाई क्रमशः गन्तव्यतर्फ पठाइएको अधिकारीले बताइन् । वर्षाका कारण थप पहिरो खस्ने जोखिम रहेकाले सवारीसाधनलाई सावधानीपूर्वक पार गराइएको छ ।
यसैबीच, गजुरी गाउँपालिका–२ छहरेमा आइतबार खसेको ठूलो पहिरोको छेउमै सोमबार ठूलो ढुंगासहितको अर्को पहिरो खसेको छ । त्यसका कारण यातायात प्रभावित भएको छ भने पहिरो पन्छाउने काम सुरु गरिएको छ ।
सडकमा खसेका ठूला ढुंगा फुटाएर हटाउनुपर्ने भएकाले यातायात पूर्ण रूपमा सहज हुन केही समय लाग्ने आयोजनाले जनाएको छ । ढुंगा हटाएपछि मात्रै सवारीसाधनलाई सुरक्षित रूपमा सञ्चालन गराउने तयारी छ ।
यसअघि गजुरी गाउँपालिका–२ कै चालिसेमा खसेको पहिरो पन्छाएर एकतर्फी यातायात सञ्चालनमा ल्याइएको थियो । बाँकी पहिरो हटाएर दुवैतर्फी यातायात सञ्चालनमा ल्याउने प्रयास भइरहेको नागढुंगा–मुग्लिन सडक आयोजना पूर्वी खण्डका प्रमुख गुरु प्रसाद अधिकारीले बताए ।
उनका अनुसार पहिरो हटाएपछि राजमार्गमा रोकिएका सवारीसाधनलाई सावधानीपूर्वक पार गराइनेछ ।
यस्तै, पृथ्वी राजमार्गअन्तर्गत गल्छी गाउँपालिका–६ स्थित बैरेनी–महेशदोभानमा पानीसँगै ढुंगा र माटोसहितको पहिरो खसेपछि सडक अवरुद्ध भएको छ ।
धादिङबेसी जोड्ने वैकल्पिक सडकसमेत पहिरोका कारण अवरुद्ध भएको छ । मासटार–बेलिनटार–आदमटार–परेवाटार सडकखण्डअन्तर्गत आदमखोला र बेलिनटारको बीचमा सुख्खा पहिरो खसेपछि सडक बन्द भएको हो ।
प्रमुख जिल्ला अधिकारी लक्ष्मी पाण्डे गौतमका अनुसार सडक डिभिजन नुवाकोटको प्राविधिक टोलीलाई घटनास्थलमा खटाइएको छ । सम्बन्धित निकायसँग समन्वय गरेर सडक खुलाउने प्रयास भइरहेको उनले बताइन् ।
प्रकाशित मिति: सोमबार, असोज १२, २०८३
-1787133994.jpg)
