काठमाडौं । दुई दिनदेखि लगातार परेको वर्षाका कारण काठमाडौं उपत्यकाको फोहर अन्तिम व्यवस्थापनमा समस्या भएको छ।
काठमाडौं महानगरपालिकाको वातावरण व्यवस्थापन विभागकी प्रमुख सरिता राईका अनुसार वर्षाका कारण सिसडोल ल्यान्डफिल साइटमा लेदोसहितको पानी बग्न थालेपछि फोहर ढुवानी तथा व्यवस्थापन प्रभावित भएको हो।
फोहरको अन्तिम व्यवस्थापनमा समस्या आएपछि राईले स्रोतमा नै फोहर व्यवस्थापन गर्न नगरवासीलाई आग्रह गरेकी छन्।
उनले घर, पसल, व्यवसाय तथा कम्पाउन्डबाट निस्कने फोहर सडक, सार्वजनिकस्थल, खोलानाला तथा खुला स्थानमा नफाल्न आग्रह गरेकी छन्। त्यस्ता स्थानमा फोहर फाल्दा सडक अवरुद्ध हुनुका साथै पानी निकासमा समेत समस्या हुने उनले बताइन्।
अवस्था सामान्य हुनासाथ फोहर सङ्कलन तथा ढुवानी नियमित गरिने राईले जानकारी दिइन्।
हाल सिसडोल ल्यान्डफिल साइटमा काठमाडौं उपत्यकाका १८ स्थानीय तहबाट दैनिक करिब २०० वटा गाडीमार्फत फोहरको अन्तिम व्यवस्थापन हुँदै आएको छ।
प्रकाशित मिति: शुक्रबार, असोज ९, २०८३
