बैतडी । भारतको उत्तराखण्डस्थित पिथौरागढमा रहेको धौलीगंगा जलविद्युत् परियोजनाको बाँध पुनः खोलिने भएको छ। आइतबार (असोज ११) राति १२ बजेदेखि सोमबार बिहान १० बजेसम्म बाँध खोल्न लागिएको हो।
एनएचपीसी लिमिटेड, धौलीगंगा पावर स्टेसन भारतबाट प्राप्त पत्रअनुसार सिल्ट सफाइका लागि बाँध खोल्न लागिएको हो। सिल्ट सफाइअन्तर्गत जलविद्युत् आयोजना, सिँचाइ नहरलगायत संरचनामा जम्मा भएको लेदो, माटो तथा बालुवा हटाइन्छ।
यसअघि गत साउन १३ गते पनि धौलीगंगा परियोजनाको बाँध खोलिएको थियो।
बाँधका ढोका खोलिएपछि महाकाली नदीको जलस्तर बढ्न सक्ने भएकाले नदी तटीय क्षेत्रका बासिन्दालाई सतर्क रहन आग्रह गरिएको बैतडीका प्रमुख जिल्ला अधिकारी मीना अर्यालले बताइन्।
उनका अनुसार बाँध खोलिएको समयमा नदीकिनारमा नजान र नदी आसपासका क्षेत्रमा आवश्यक सावधानी अपनाउन स्थानीयलाई आग्रह गरिएको छ।
दार्चुलादेखि बैतडी, डडेल्धुरा र कञ्चनपुर हुँदै भारततर्फ बग्ने महाकाली नदीमा पानीको सतह बढ्न सक्ने भएकाले नदी छेउछाउमा नजान प्रशासनले अनुरोध गरेको हो।
२८० मेगावाट क्षमताको धौलीगंगा जलविद्युत् परियोजनाको बाँध खोल्नुअघि भारतीय पक्षले नेपाली पक्षलाई सतर्कताका लागि जानकारी गराउने गरेको छ।
प्रकाशित मिति: शुक्रबार, असोज ९, २०८३
