काठमाडौं । भक्तपुरको मध्यपुर ठिमी हुँदै बग्ने हनुमन्ते खोलाको बहाव बढेपछि जोखिममा रहेका १६ परिवारका ९५ जनालाई सुरक्षित स्थानमा सारिएको छ।
भक्तपुर प्रहरीले ठिमीका १६ परिवारका ९५ जनालाई सुरक्षित स्थानमा स्थानान्तरण गरिएको जनाएको छ।
बिहीबारदेखि परेको अविरल वर्षाका कारण काठमाडौं उपत्यकासहित देशभरको जनजीवन प्रभावित भएको छ। वर्षाका कारण विभिन्न सडकसमेत अवरुद्ध भएका छन्।
हालसम्म बाढी तथा पहिरोबाट ठूलो क्षति भएको सूचना प्राप्त नभएको प्रहरीले जनाएको छ। अविरल वर्षाका कारण हुनसक्ने धनजनको क्षतिलाई ध्यानमा राख्दै देशभर प्रहरीलाई हाइअलर्टमा राखिएको छ।
प्रहरी प्रवक्ता डीआईजी अविनारायण काफ्लेका अनुसार नदीतटीय क्षेत्रका नागरिकलाई सुरक्षित स्थानमा सार्नुका साथै सम्भावित जोखिमबारे सचेत गराउन प्रहरीले निरन्तर माइकिङ गरिरहेको छ।
प्रकाशित मिति: शुक्रबार, असोज ९, २०८३
