काठमाडौं । गृह मन्त्रालयका सचिव केदारनाथ शर्माले विपद् प्रभावित क्षेत्रमा खोज तथा उद्धार कार्यलाई निरन्तरता दिइरहेको बताएका छन् ।
सोमबार कानुन, न्याय तथा मानव अधिकार समितिको बैठकमा बोल्दै शर्माले विशेषगरी जलविद्युत् आयोजनाका सुरुङमा फसेकाहरूको खोज तथा उद्धार भइरहेको बताए ।
‘विशेष गरी हाइड्रोपावरका सुरुङमा बस्नुभएकाहरूको खोज तथा उद्धारको कार्य भइरहेको छ,’ उनले भने ।
कतिपय सुरुङमा भौगोलिक अवस्था, प्रविधिको अभाव र कठिन परिस्थितिका कारण उद्धारमा समय लागेको उनले बताए । अन्तर्राष्ट्रिय खोज तथा उद्धार विज्ञहरूले समेत घटनास्थलको भौगोलिक अवस्था कठिन रहेको बताएका उनले जानकारी दिए ।
‘कतिपय टेक्नोलोजी हामीसँग भएन, विषम परिस्थिति थियो, भौगोलिक अवस्था गाह्रो थियो । विशेषगरी अन्य देशबाट आएका खोज तथा उद्धारका विज्ञहरूले पनि त्यहाँको भूगोल देखिसकेपछि साँच्चै गाह्रो रहेछ भन्ने कुरा भन्नुभएको छ । त्यसकारण खोज र उद्धार कार्यमा अलि ढिलो भयो,’ शर्माले भने ।
सम्भावना रहेसम्म खोज तथा उद्धार जारी राख्ने विषयमा सुरक्षा निकायका प्रमुख तथा विपद् विज्ञहरूसँग छलफल भइरहेको उनले बताए । खोज तथा उद्धारपछि राहत, पुनर्स्थापना र पुनर्निर्माणको काम अघि बढाइने उनको भनाइ छ ।
‘अहिले हाम्रो ध्यान खोज र उद्धारमा नै छ । यसपछि विस्तारै राहतमा जान्छौँ,’ शर्माले भने, ‘त्यसपछि पुनर्स्थापना र पुनर्निर्माणको काम हुन्छन् ।’
बाढी प्रभावित क्षेत्रमा महिला तथा बालबालिकाको संरक्षणका लागि स्थानीय तहसँग समन्वय भइरहेको उनले बताए । बालबालिकाको संरक्षणका लागि राष्ट्रिय बाल अधिकार परिषद्का प्रतिनिधिलाई होल्डिङ सेन्टरमा परिचालन गरिएको उनको भनाइ छ ।
उद्धार गरिएका तथा अभिभावकबाट छुटेका बालबालिकाको व्यवस्थापन स्थानीय सरकारले गरिरहेको शर्माले बताए । हालसम्म बालबालिकाको अवस्थाबारे गम्भीर विचलन वा थप समस्या नदेखिएको उनले जानकारी दिए ।
प्रकाशित मिति: सोमबार, असोज ५, २०८३
