काठमाडौं । खोज तथा उद्धारका क्रममा माथिल्लो त्रिशूली–१ जलविद्युत् आयोजनाको सुरुङमा ६ जनाको शव भेटिएको छ।
नेपाली सेनाका अनुसार आयोजनाका प्रतिनिधिसहितको संयुक्त उद्धार टोलीले खोजी गर्ने क्रममा अडिट–३ टनेलभित्र ढलानका लागि बुनिएको डन्डीको जालीको भित्री भागमा अल्झिएको अवस्थामा ६ वटा शव फेला पारेको हो।
सेनाले शुक्रबार जारी गरेको विज्ञप्तिअनुसार ग्राइन्डर, ग्यास कटर र रोटरी रेस्क्युको प्रयोग गरी शवहरू सुरुङबाट बाहिर निकालिएको छ।
सुरुङभित्र हिलोले छोपिएको अवस्थामा अन्य शवजस्तो आकृति पनि देखिएकाले सो क्षेत्रमा थप खोजी कार्य भइरहेको सेनाले जनाएको छ।
भदौ १० गते रसुवाको भोटेकोसीमा आएको विनाशकारी बाढी माथिल्लो त्रिशूली–१ जलविद्युत् आयोजनाको सुरुङमा प्रवेश गरेको थियो।
प्रकाशित मिति: शुक्रबार, असोज २, २०८३
