४ साउन, काठमाडौँ । सर्वोच्च अदालतले चूडामणि शर्माविरूद्ध विशेष अदालतमा दायर भएको मुद्दा अगाडि नबढाउन आदेश दिएको छ । आन्तरिक राजस्व विभागका निलम्बित महानिर्देशक शर्माविरुद्ध विशेषमा विचाराधिन मुद्दा नै अब तत्काल अघि नबढ्ने भएको छ । न्यायाधीश प्रकाशमान सिंह राउत र चोलेन्द्रशमशेर जबराको इजलाशले बन्दी प्रत्यक्षीकरण मुद्दाको सुनुवाइ गर्दै बुधबार शर्माको मुद्दालाई सर्वोच्चको पूर्ण इजलासमा पठाउने निर्याय गरेको छ । सर्वोच्चको पूर्ण इजलासले अर्को आदेश नदिएसम्मका लागि मुद्दा अघि नबढाउन आदेश दिएको सर्वोच्चका प्रवक्ता महेन्द्रनाथ उपाध्यायले जानकारी दिए । शर्मालाई अहिले जुन हिरासतमा राखिएको छ, त्यही हिरासतमा राख्न पनि अदालतले आदेश दिएको छ । शर्मालाई गैरकानुनी रुपमा थुनामा राखेको भन्दै शर्माकी श्रीमती कल्पना उप्रेतीले थुनामुक्त गर्न माग गर्दै सर्वोच्चमा रिट दायर गरेकी थिइन । अख्तियारले शर्मासहित कर फछ्र्योट आयोगका अध्यक्ष लुम्बध्वज महत र सदस्य उमेश ढकालविरुद्ध १० अर्ब २ करोड १९ लाख ८ सय २४ रुपैयाँ भ्रष्टाचार गरेको अभियोगमा विशेष अदालतमा मुद्दा दायर गरेको थियो । यो मुद्दा अहिलेसम्मकै ठूलो भ्रष्टाचार मुद्दा हो । चुडामणी शर्मा अख्तियारको हिरासतमा रहेका छन् भने बाँकी २ जना फरार छन् ।
प्रकाशित मिति: मंगलबार, साउन ३, २०७४
-1732776560.jpg)
