१ साउन, काठमाडौँ । अख्तियार दुरुपयोग अनुसन्धान आयोगले कर निर्धारणमा अनियमितता गरेको आरोपमा आन्तरिक राजस्व विभागका महानिर्देशक चूडामणि शर्मासहित ३ जनाविरुद्ध भ्रष्टाचारको मुद्दा दर्ता गरेको छ । अख्तियारले शर्मासहित कर फछ्र्योट आयोगका अध्यक्ष लुम्बध्वज महत र सदस्य उमेश ढकालविरुद्ध १० अर्ब २ करोड १९ लाख एक हजार ८ सय ४२ रुपैयाँ बिगो र त्यसको दोब्बर जरिवाना मागदाबी गर्दै विशेष अदालतमा मुद्दा दर्ता गरेको हो । आयोगले दर्ता गरेको मुद्धामा तत्काल छानविन सुरु गर्ने विशेष अदालतका रजिष्ट्रार भीम कुमार श्रेष्ठले जानकारी दिए । बिगो र जरिवाना मागदाबी गरेको कुल रकम जोड्दा त्यसको आकार ३० अर्ब भन्दा धेरै हुने अख्तियारले जनाएको छ । भ्रष्टाचार निवारण ऐनको दफा ७ मा राजस्व चुहावट सम्बन्धी आरोप पुष्टि भए बिगो र त्यसको दोब्बर बराबर जरिवाना हुने व्यवस्था छ । अख्तियारले विस्तृत छानबिन थालेदेखि नै आयोगका अध्यक्ष महत र सदस्य ढकाल फरार छन् भने सदस्य सचिव समेत रहेका चूडामणि शर्मा अख्तियारकै हिरासतमा छन् ।
प्रकाशित मिति: शनिबार, असार ३१, २०७४
-1732776560.jpg)
