खलङ्गा । जुम्लाका आठ स्थानीय तहमध्ये तीन स्थानीय तहले आफ्नौ प्रशासनिक भवन निर्माण गर्दैछन् । जसमा तिला गाउँपालिका, सिञ्जा गाउँपालिका र तातोपानी गाउँपालिका रहेका छन् ।
यहाँका स्थानीय तहले साँघुरो कोठाबाट प्रशासनिक कार्य गर्दै आएकाले करिब १६ रोपनी क्षेत्रफलमा सबै विषयगत शाखा र प्रशासन सञ्चालनका लागि सभाकक्षसहित आधुनिक र सुविधा सम्पन्न भवन निर्माण गर्न लागि परेको तिला गाउँपालिका अध्यक्ष रतननाथ योगीले बताए ।
आगामी दुई वर्षभित्र भवन निर्माण गर्ने लक्ष्यसहित प्रक्रिया अघि बढेको सिञ्जा गाउँपालिका अध्यक्ष देवलसिंह रावलले बताए । नयाँ बन्ने भवन अपाङ्गमैत्री हुने तातोपानी गाउँपालिका अध्यक्ष नवराज न्यौपानेले बताए ।
यहाँका छ गाउँपालिकाले हाल प्रयोग गरेका प्रशासनिक भवन निजी घरमा भाडा तिरेर बसेका छन् । चन्दननाथ नगरपालिकाको आफ्नौ प्रशासनिक भवन रहेको र गुठीचौर गाउँपालिकाले साविको गाविस भवनमा प्रशासनिक कार्यालय सञ्चालनमा ल्याएको गाउँपालिका अध्यक्ष हरिबहादुर भण्डारीले बताए । पातारासी गाउँपालिका, गुठीचौर गाउँपालिका, हिमा गाउँपालिका र कनका सुन्दरी गाउँपालिकाले प्रशासनिक भवन निर्माण कुनै टुङ्गे लगाएका छैनन् ।
अस्थायी कोभिड अस्पताल
गुठिचौर गाउँपालिकाले पाँच श्ययाको अस्थायी कोभिड अस्पताल सञ्चालनमा ल्याएको छ । सो गाउँपालिकाको वडा नं ५ मा अस्पताल सञ्चालन गरेका गाउँपालिकाका अध्यक्ष हरिबहादुर भण्डारीले बताए । नवनिर्मत भवनको उद्घाटन गर्दै गाउँपालिका अध्यक्ष भण्डारीले विस्तारै सेवा सुविधा थप्दै जाने तयारी भइरहेको जानकारी दिए ।
कोभिड अस्पतालमा आवश्यक पर्ने सबै सुविधा उपलब्ध गराउनका लागि स्थानीय सरकार लागि परेको अध्यक्ष भण्डारीले बताए । अब कोभिड अस्पतालमा सघन उपचार कक्ष र भेन्टिलेटरसहितको उपकरण थप्ने गरी काम भइरहेको गाउँपालिकाका प्रमुख प्रसाशकीय अधिकृत रामालाल प्याकुरेलले बताए ।
सङ्घीय सरकारले कोभिड अस्पताल निर्माणको लागि रु १० लाख बजेट पठाएको गाउँपालिकाले जनाएको छ । सो अस्पातलमा अहिले दुई स्टाफ नर्स र एक जना कार्यालय सहयोगी कार्यरत रहेको गाउँपालिका स्वास्थ्य संयोजक बालकराम नेपालीले बताए । गाउँपालिकामै कोभिड अस्पताल निर्माण हुँदा निकै सहज हुने स्थानीयवासी बताउँछन् ।
प्रकाशित मिति: आइतबार, मंसिर २८, २०७७
