४ असार, काठमाडौँ । दोस्रो चरणको निर्वाचन पनि बहिष्कारको घोषणा गरेको राष्ट्रिय जनता पार्टी र नेपाल कम्युनिष्ट पार्टीले स्वतन्त्र उम्मेदवारी दिएको छ । राजपाले रुपन्देहीका तीन स्थानीय तहमा उम्मेदवारी दिएको छ । राजपाका कार्यकर्ताले स्वतन्त्र उम्मेदवारका रूपमा मनोनयन दर्ता गराएका हुन । राजपाका नेताहरुले सम्मरीमाई, कोटहीमाई र मर्चवारीमाईको सम्पुर्ण पदमा स्वतन्त्र उम्मेदवारको रुपमा मनोनयन दर्ता गराएका छन । समरीमाइ गाउँपालिकाको अध्यक्षमा अशोक सुक्ल र उपाध्यक्षमा कमरउद्दिन खाँले उम्मेदवारी दर्ता गराएका छन । राजपाले चुनावमा भाग नलिने भन्दै आन्दोलन थालेपछि असन्तुष्ट नेता कार्यकर्ताले स्वतन्त्र रुपमा उम्मेदवारी दिएका हुन् ।
यस्तै रोल्पामा नेत्रविक्रम चन्द विप्लव नेतृत्वको नेपाल कम्युनिष्ट पार्टीले पनि चुनावमा भाग लिएको छ । देशभर स्थानीय चुनाव बहिस्कार गरेको विप्लव समूहले रोल्पाको थवाङमा भने उम्मेदवारी दर्ता गराएको छ । थवाङ गाउँपालिकाको अध्यक्षमा विप्लव नेतृत्वको नेकपाबाट भक्तबहादुर घर्तीले उम्मेदवारी दर्ता गराएका छन् । नेकपा निर्वाचन आयोगमा दल दर्ता नभएकाले घर्तीको स्वतन्त्र रुपमा उम्मेदवारी दर्ता भएको छ । उनी रोल्पाको उवा निवासी हुन् ।
प्रकाशित मिति: शनिबार, असार ३, २०७४
-1732776560.jpg)
