२२ जेठ, काठमाडौँ । साउदी अरबको नेतृत्वमा युएई, इजिप्ट र बहराइनले कतारसँग कुटनीतिक सम्बन्ध विच्छेदको निर्णय गरेका छन । अमेरिकी राष्ट्रपति डोनाल्ड ट्रम्पको रियाद भ्रमणको केही समयपछि चार देशको यस्तो निर्णय आएको हो । कतारसँग कुटनीतिक सम्बन्ध विच्छेद गरेपछि खाडी मुलुकहरुबीच नयाँ समस्या सिर्जना भएको छ । कतार र इरानबीचको सम्बन्धलाई लिएर मुस्लिम मुलुकहरुमा विभाजन देखिनुमा अमेरिका फ्याक्टर निर्णायक देखिएको अन्तर्राष्ट्रिय सञ्चार माध्यमहरुले जनाएका छन । कतारको विदेश मन्त्रालयले एक विज्ञप्ति जारी गर्दै साउदी अरब नेतृत्वमा चार मुलुकहरुले गरेको निर्णय ‘अन्यायपूर्ण’ भएको जनाएको छ । कतारले विज्ञप्ति जारी गर्दै उनीहरुको निर्णयले ‘एक सार्वभौमसत्ता सम्पन्न राष्ट्रको सार्वभौमिकतामा खलल पुर्याएको’ बताएको छ । कतारले इरानको सहयोगमा आतंककारी गतिविधि फैलाउन सहयोग पुर्याएको आरोप लगाउँदै चार साउदी गठबन्धनका मुलुकहरुले कतारलाई एक्ल्याउने निर्णय गरेका हुन् । इरान र अमेरिकाबीच सम्बन्ध पहिल्यैदेखि तनाबपूर्ण छ ।
साउदीले कतारसँगका सबै स्थल हवाई तथा सामुद्रिक सीमाना समेत बन्द गरेको छ । आतंकवादी खतराबाट देशलाई जोगाउन भन्दै साउदीले सोमबार बिहान राष्ट्रिय सुरक्षाका लागि उक्त घोषणा गरेको जनाएको छ । कतारी नागरिकलाई देश छोड्न साउदीले दुई हप्ताको समय दिएको छ । उसले कतारसँगको हवाई सम्पर्क समेत विच्छेद गर्ने निर्णय लिएको छ । साउदी, इजिप्ट, युएई र बहराइनका सबै एयरलाइन्सहरुले कतारको उडान नगर्ने घोषणासँगै इतिहादको काठमाडौं—दोहा उडान समेत प्रभावित बनेको छ । बहराइनले कतारका कुटनीतिज्ञहरुलाई देश छोड्नका लागि ४८ घण्टाको समय दिएको छ । इजिप्ट विदेश मन्त्रालयले पनि एक विज्ञप्ती निकाल्दै राष्ट्रिय सुरक्षाको विषयलाई विशेष महत्व दिँदै कतारका जहाज र विमानका लागि सबै मार्ग बन्द गरिएको घोषणा गरेको छ ।
प्रकाशित मिति: आइतबार, जेठ २१, २०७४
-1732776560.jpg)
