१६ जेठ, काठमाडौँ । राष्ट्रिय मुस्लिम संघर्ष गठबन्धनले सरकार धार्मिक स्वतन्त्रता हनन गर्न उद्धत रहेको आरोप लगाएको छ । मंगलबार कामचलाउ सरकारका प्रधानमन्त्री पुष्पकमल दाहाललाई भेटेर गठबन्धनले ज्ञापनपत्र बुझाएको छ । गठबन्धनका संयोजक शमीम अन्सारीले धार्मिक स्वतन्त्रतासमेतको हनन हुने गरि सरकारले दोस्रो चरणको निर्वाचन असार ९ गते गर्ने निर्णय गरेको भन्दै आपत्ति जनाए । उनले मुस्लिम समूदायको रमजानको महत्वपूर्ण दिन रहेकाले असार ९ गतेको निर्वाचन सार्न चेतावनी दिएका छन । जेठ २० सम्म सरकारले निर्वाचन सार्ने निर्णय नगरे आन्दोलन गर्ने भन्दै आन्दोलनका कार्यक्रम समेत सार्वजनिक गरेको छ । ज्ञापनपत्रमा भनिएको छ ‘मुस्लिम समुदायको रमजान जेष्ठ १४ गतेदेखि शुरु भएको छ । रमजानमा हामी मुस्लिम समुदाय निराहार बसेर व्रत बस्छौं । व्रत बसेर लाममा बसी मत खसाउनु सम्भव हुँदैन । तसर्थ, ईदपछिको मितिमा निर्वाचन सार्नका लागि सरकारसँग अपिल गर्दछौँ ।’ गठबन्धनले माग सम्बोधन नभए जेठ २१ गते देशभरका जिल्ला प्रशासन कार्यालय घेराउ गर्ने, जेठ २२ गते देशभरका प्रमुख शहरहरूमा १२ बजे देखि २ बजेसम्म २ घण्टे चक्का जाम गर्ने र जेठ २३ गते देशभरका निर्वाचन आयोगका कार्यालयहरूमा अनिश्चितकालीन तालाबन्दी गर्ने चेतावनी दिएको छ ।
प्रकाशित मिति: सोमबार, जेठ १५, २०७४
-1732776560.jpg)
