१० जेठ, कैलाली । नेपाल विद्यार्थी संघका नेताहरुले कैलाली बहुमुखी क्याम्पसमा स्ववियु निर्वाचनमा विद्यार्थीले दिएको मतको पत्र च्यातेका छन । मतपत्र च्यात्ने विद्यार्थी नेताहरुलाई प्रहरीले पक्राउ पनि गरेको छ । पक्राउ पर्नेमा नेपाल विद्यार्थी संघका सभापतिका प्रत्यासी गुरुदेव के.सी, नेविसंघका क्षेत्र नम्बर ६ का अध्यक्ष गजेन्द्र विक्रस सिंह, नेविसंघ कै जिल्ला अध्यक्ष भेषबहादुर बम, दिलिप केसी, तिलक बटाला र दिपेन्द्र सिंह रहेको जिल्ला प्रहरी कार्यालय कैलालीका प्रहरी नायब उपरिक्षक विरबहादुर बुढामगरले जानकारी दिए । मतगणना अन्तिम अवस्थामा पुग्ने बेलामा पराजय निश्चित भएपछि नेविसंघका तर्फबाट गणनामा सहभागीले झण्डै २४८ मत पत्र च्यातेको निर्वाचन अधिकृतको कार्यालयले जनाएको छ । हालसम्मको परिणाममा अनेरास्ववियुका उम्मेदवारहरु एक सय भन्दा बढी मतले अग्रता लिइरहेका थिए ।
अनेरास्ववियुका कार्यबाहक अध्यक्ष महेश बर्तौलाले ७ नम्बर प्रदेशकै सबभैन्दा ठूलो कैलाली बहुमुखी क्याम्पस धनगढीको स्ववियु निर्वाचनको मतगणनामा नेविसंघले देखाएको हर्कतले लोकतन्त्रको खिल्लि उडाएको बताएका छन । उनले गनिसकेको मतपरिणामलाई नै आधार बनाएर अन्तिम परिणाम सार्वजनिक गर्नुपर्ने माग पनि गरेका छन । करिब १६ सय मत गनिएपछि नेविसंघका गणकले मतपत्र च्यातेपछि गणना बिथोलिएको हो । मतगणना भैरहदा केही व्यक्तिहरुले मतपत्र च्यातेपछि मतगणना स्थगित भएको निर्वाचन अधिकृत श्यामराज जोशीले जानकारी दिए । हिजो भएको निर्वाचनमा १ हजार ९ सय ३६ मत खसेको थियो ।
नेपाल विद्यार्थी संघका अध्यक्ष नैनसिंह महरले साथीहरुलाई आफूले फोन गर्दा सम्पर्क नभएको भन्दै फर्जी मत खसेको पाइएकोले विवाद भएको बताए । तपाईका कार्यकर्ताले मतपत्र नै च्यातेर प्रहरीले प्रक्राउ गरेको छ नि भन्ने प्रशनमा महरले भने ‘यसबारेमा मलाई धेरै थाहा छैन । गणना भएको १ हजार ५ सय ७५ मतमा अनेरास्ववियुका चुडामणी भट्टले ६ सय ३६ मतका साथ अग्रता लिएका छन् । नेविसंघका गुरुदेव केसी (सुमन) ले ४ सय ६२ मत प्राप्त गरेको निर्वाचन अधिकृत जोशीले बताए । अन्तिम मतपेटिकाको मतगणना गर्ने तयारी गरिरहेको अवस्थामा मतपत्र च्यातिएको हो ।
प्रकाशित मिति: मंगलबार, जेठ ९, २०७४
