१० जेठ, काठमाडाैँ । कालिकाेट नरहरिनाथ गाउँपालिकाको अध्यक्षमा नेकपा एमालेका धिरवहादुर विष्ट विजयी भएका छन । बुधबार बिहान सम्पन्न मतगणनाको परिणामा अनुसार विष्टले २४६० मत प्राप्त गरेका छन । उनका निकटतम प्रतिद्वन्दी काँग्रेसका मिनवहादुर वाेगटीले २२२८ मत प्राप्त गरेका छन । त्यसैगरी, उपाध्यक्षमा नेकपा (माओवादी केन्द्र) का उम्मेदवार मनशोभा बुढा विजयी भएकी छिन । उनले दुइ हजार २४९ मत ल्याई विजयी भइन । उनकाे निकटतम प्रतिद्वन्द्वी नेकपा (एमाले)का सुनिता बुढाले दुई हजार ३८ मत प्राप्त गरिन । नरहरिनाथ गाउँपालिकामा चारवटा वडामा नेकपा (एमाले), तीनवटा वडामा नेकपा (माओवादी केन्द्र) र दुईवटा वडामा नेपाली काँग्रेसले जित हासिल गरेको निर्वाचन अधिकृत प्रदीपराज अधिकारीले बताए । कालीकोट जिल्लामा दुई नगरपालिका (तिलागुफा र रास्कोट) सहित तीन गाउँपालिका (पचालझरना, सान्नित्रिवेणी र पलांता)मा नेकपा (माओवादी केन्द्र)ले जित हासिल गरेको छ भने खांडाचक्र नगरपालिकामा नेकपा (एमाले)ले जित हासिल गरेको छ । महावै गाउँपालिकामा अध्यक्ष नेपाली काँग्रेस र उपाध्यक्षमा नेकपा (एमाले)ले विजय हात पारेको छ भने नरहरिनाथ गाउँपालिकामा अध्यक्ष नेकपा (एमाले) र उपाध्यक्षमा नेकपा (माओवादी केन्द्र)ले जित हासिल गरेको छ ।
प्रकाशित मिति: मंगलबार, जेठ ९, २०७४
