२९ वैशाख, ओखलढुंगा । ओखलढुंगामा चौमासिक रुपमा वितरण हुने जेष्ठ नागरिक तथा असहाय भत्ता वितरण हुन सकेको छैन । फागुनमा वितरण हुनु पर्ने भत्ता जिल्ला समन्वय समिति र स्थानीय तहको खाता सञ्चालन तथा कार्य सञ्चालनमा भएको सुस्तताले जेष्ठ तथा अपांगता भएका व्यक्तिले भत्ता नपाएका हुन् । ओखलढुंगाका सात गाउँपालिका र एक नगरपालिकामा जेष्ठ नागरिक भत्ता वितरण भएको छैन । स्थानीय तहको खाता सञ्चालन र निकासामा कर्मचारीले ढिलाइ गर्दा समस्या भएको हो । जिल्ला समन्वय समितिका कर्मचारीले समस्यमा निकासा पठाउन काम नगरको स्थानीय तहका कर्मचारीको आरोप छ । जिल्लाभर फागुनमा वितरण हुने भत्ता वितरण नहुँदा भत्ता पाउने आशमा बसका अपांगता भएका र जेष्ठ नागरिक आक्रोशित भएका छन् । स्थानीय तहमा पठाइएको रकम समेत वडाको खातामा पठाउन खाता सञ्चालन हुन बाँकी रहेको भन्दै वितरण भएको छैन् । साविकको एउटा गाविस दुई फरक–फरक गाउँपालिकामा परेकाको खाता सञ्चालन र विवरण मिलाउन कठिन भएकाले एक महिना लाग्न सक्ने खिजी देम्वा गाउँपालिकाका वडा सचिव गणेश बाँस्तोलाले बताए । सरकारी निकायको वेवास्ताका कारण भत्ता वितरणमा ढिलाई भएको छ । जिल्ला समन्वय समितिमा कहिले प्रमुख, कहिले लोखापाल र फाँटका कर्मचारी नहुँदा समस्या हुने गरेको हो । ओखलढुंगाकाकै सिद्धिचरण नगरपालिकाले भने वितरण शुरु भइसकेको जनाएको छ ।
प्रकाशित मिति: बिहीबार, वैशाख २८, २०७४
