२४ वैशाख, काठमाडौँ । प्रधानन्यायाधीश सुशीला कार्कीले राष्ट्रपति विद्यादेवी भण्डारीलाई कानुन दिवसको निमन्त्रणा दिएकी छन । आइतबार साँझ राष्ट्रपति भवन शितल निवास पुगेकी कार्कीले राष्ट्रपतिलाई कानुन दिवसको निमन्त्रण दिएको राष्ट्रपतिका प्रेस सल्लाहकार माधव शर्माले जानकारी दिए । संसदमा महाअभियोग प्रस्ताव दर्ता भएपछि सर्वोच्च पुगेको पहिलो दिननै कार्कीले राष्ट्रपतिलाई निन्मन्त्रणा दिएकी हुन । नेपालमा सर्वप्रथम २००९ सालमा प्रधान न्यायालय ऐन २००८ जारी भएको दिनको सम्झनामा हरेक वर्ष वैशाख २६ गते कानुन दिवस मनाउने गरिन्छ । यो ऐनले प्रधान न्यायालयबाट भएका आदेश तथा फैसला अकाट्य तथा अन्तिम हुने कानुनी ब्यवस्था गरेको थियो । वैशाख २६ को दिनलाई नेपालको न्यायिक इतिहासमा प्रजातन्त्र, मानव अधिकार र स्वतन्त्र न्यायपालिकाको प्रस्थानविन्दुको रुपमा लिइन्छ । कानुृन दिवसको अवसरमा हरेक वर्ष सर्बोच्च अदालतमा विशेष कार्यक्रमको आयोजना गर्ने गरिएको छ । भेटमा महाअभियोगको सन्दर्भ र त्यसपछि उत्पन्न भएको परिस्थितिको विषयमा समेत कुराकानी भएको बुझिएको छ ।
प्रकाशित मिति: शनिबार, वैशाख २३, २०७४
