१८ वैशाख, काठमाडौँ । नेपाली सेनाले देशमा विकसित घटनाक्रमको समीक्षा गर्दै आवश्यक सुरक्षा सतर्कता अपनाउने निर्णय गरेको छ । सैनिक मुख्यालय जङ्गी अड्डामा गएराति बसेको पिएस ओजको आकस्मिक बैठकले वर्तमान परिस्थितिबाट उत्पन्न हुनसक्ने सुरक्षा चुनौतीको समीक्षापछि सुरक्षा सतर्कता अपनाउने निर्णय गरेको सैनिक जनसम्पर्क निर्देशनालयले जनाएको छ । स्थानीय तहको निर्वाचनको नजिकिँदो मिति र सहमतिको निर्माण गर्न राजनीतिक दलबीच भइरहेको प्रयास बारे बैठकमा समीक्षा भएको थियो । प्रधानन्यायाधीशविरुद्ध आकस्मिकरुपमा संसद्मा दर्ता भएको महाअभियोगको प्रस्ताव, उपप्रधानमन्त्री एवम् गृहमन्त्री विमलेन्द्र निधिको राजीनामालगायत देशमा हाल विकसित घटनाक्रमको समीक्षा गर्न बसेको सेनाको उच्चस्तरको बैठकमा मुलुकको समग्र सुरक्षा चुनौतीको विश्लेषण गरिएको र सुरक्षा सतर्कता अपनाउने निर्णय भएको सैनिक जनसम्पर्क निर्देशनालयले जनाएको छ । यसैबीच सामाजिक सञ्जालमा सेनको बैठकको विषयलाई लिएर कतिपयले सैनिक कुको आशंका समेत गरेका छन । केहीले भने सेनाको बैठक नियमितजस्तो रहेकाले अलोचना गर्नुको कुनै अर्थ नहुने बताएका छन ।
प्रकाशित मिति: आइतबार, वैशाख १७, २०७४
