७ वैशाख, काठमाडौँ । काठमाडौ पकनाजोल स्तिथ पिपुल्स क्याम्पसमा स्ववियु निर्वाचन आज भइरहेको छ । बिहान आठ बजेबाट मतदान शुरु भएको छ । दिउँसो २ बजेसम्म मतदान हुने र दिउँसो ४ बजेबाट मतगणना सुरु हुने अनेरास्ववियुका सचिव आरसी लामिछानेले जानकारी दिए । उनले निर्वाचनमा नेविसंघ र अखिल क्रान्तिकारीले सुरुमा भाग नलिने भने पनि अन्तिममा आएर सहभागीता जनाएको जानकारी दिए । स्ववियुको नेतृत्वका लागि अनेरास्ववियुबाट आदित बोहरा नेविसंघबाट अरुण घले र अखिल क्रान्तिकारीबाट सचिन भुर्तेलको प्यानल प्रतिस्पर्धामा छ ।
यसअघि चैत २७ गते पिपुल्स क्याम्पसमा स्वतन्त्र विद्यार्थी युनियन स्ववियुको निर्वाचन गराउन सर्बोच्चले आदेश दिएको थियो । न्यायाधीश सपना प्रधान मल्लको एकल इजलासले अन्तरिम आदेश दिएपछि क्याम्पस प्रशासनले निर्वाचनको तयारी गरेको थियो । क्याम्पस प्रशासनले चुनाव हुन नदिएको भन्दै स्ववियु सभापतिका प्रत्याशीहरु अनेरास्ववियुका आदित्य बोहोरा र नेविसंघका अरुण घलेले संयुक्त रुपमा रिट दायर गरेका थिए ।
प्रकाशित मिति: बुधबार, वैशाख ६, २०७४
