२९ चैत, काठमाडौं । सरकारले डीआईजी प्रकाश अर्याललाई प्रहरी महानिरीक्षकमा नियुक्त गरेको छ । सोमबार राति सम्पन्न मन्त्रिपरिषद् बैठकले अर्याललाई प्रहरी महानिरीक्षकमा बढुवा गर्ने निर्णय गरेको हो । चार वर्षको कार्यसम्पादनको मूल्याङ्कनका आधारमा अर्यालले १५४.२ अङ्क प्राप्त गरेका छन । त्यसैगरी प्रहरी नायब महानिरीक्षक नवराज सिलवालले १५२.४, बमबहादुर भण्डारीले १५०.२ र जयबहादुर चन्दले १४७.६ अङ्क प्राप्त गरेका छन । सरकारले गत फागुन १ गते प्रहरी नायब महानिरीक्षक चन्दलाई प्रहरी प्रमुखमा बढुवा गरेकामा सर्वाेच्च अदालतले बढुवाका आधार पेस गर्न आदेश दिएको थियो ।
नम्बर दिन समिति
महान्यायाधिवक्ता रमणकुमार श्रेष्ठको संयोजकत्वमा कानुनसचिव कमलशाली घिमिरे, प्रधानमन्त्री तथा मन्त्रिपरिषद् कार्यालयका सचिव टंकमणि शर्मा, गृहसचिव लोकदर्शन रेग्मी र निमित्त प्रहरी महानिरीक्षक डा. दिनेशचन्द्र पोख्रेल रहेको समितिले तत्कालै काम सुरु गर्याे । चारै डिआइजीको कार्यसम्पादन मूल्यांकनको फाइल गृह मन्त्रालय, लोकसेवा आयोग र प्रहरी प्रधान कार्यालयबाट मगाएर अध्ययन ग¥यो । झन्डै तीन घन्टा अध्ययन गरेर समितिले प्रतिवेदन बुझाएपछि मन्त्रिपरिषद् बैठक बस्यो । समितिको प्रतिवेदनअनुसार कार्यसम्पादन मूल्यांकनमा एक नम्बरमा रहेका अर्याललाई मन्त्रिपरिषद्ले आइजिपीमा नियुक्त गर्ने निर्णय गर्यो ।
दर्ज्यानी चिन्ह र पदबाहाली
गृहसचिव लोकदर्शन रेग्मीले नवनियुक्त प्रहरी महानिरीक्षक प्रकाश अर्याललाई सोमबार नै गृह मन्त्रालयमा आयोजित समारोहमा दज्र्यानी चिह्न प्रदान गरे । विसं २०४४मा प्रहरी निरीक्षकबाट सेवा प्रवेश गरेका अर्याल २६ औँ प्रहरी महानिरीक्षक बने । मन्त्रालयमा आयोजित समारोहमा अर्याललाई फुली लगाइदिँदै गृहसचिव रेग्मीले उनकोे कार्यकालमा नेपाल प्रहरीको गौरव अझ उचाइमा पुग्ने विश्वास व्यक्त गरे । लगत्तै प्रहरी प्रधान कार्यालय पुगेर अर्यालले पदभार ग्रहण गरे ।
सिलवाल असन्तुष्ट
प्रहरी प्रमुखको दाबीदारी गरिरहेका डिआइजी नवराज सिलवाल सरकारको निर्णयबाट असन्तुष्ट बनेका छन । उनले झेल गरेर आफूलाई कार्यसम्पादन मूल्यांकनमा केही अंक कम दिइएको भन्दै कानुनी उपचार खोज्ने बताएका छन ।
अर्यालको विगत
दाङमा जन्मिएका प्रकाश अर्याल २०४४ सालमा प्रहरी निरीक्षकबाट सेवा प्रवेश गरेका थिए । यसअघि ट्राफिक प्रहरी महाशाखाको जिम्मेवारी सम्हालेका अर्याल अहिले सिआइडी प्रमुख थिए । ट्राफिक प्रहरी महशाखामा रहेका बेला ट्राफिक क्षेत्रमा नयाँ नयाँ काम गरेर उनी चर्चामा आएका थिए । अर्याल यसअघि सुन तस्करीमा संलग्नन भएको अभियोगमा विभागिए कारबाहीमा परेका थिए । जसका कारण उनले महानिरीक्षक नियुक्तिको पहिलो दौडमा आफूलाइ प्रस्तुत गर्न समेत डराएका थिए ।
प्रकाशित मिति: आइतबार, चैत २७, २०७३
