२७ चैत, पर्सा । स्थानीय तह निर्वाचन आउन ३५ दिन बाँकी रहँदा पर्सामा चुनावी गतिविधि तीव्र भएको छ । स्थानीय तह निर्वाचनका लागि राजनीतिक दलहरू उम्मेदवार छनोटमा जुटेका छन् र सङ्गठन विस्तारदेखि पार्टी प्रवेश कार्यक्रमलाई पनि तीव्रता दिएका छन् । पर्सामा रहेका राजनीतिक दलले स्थानीय तहका लागि उम्मेदवारको नामावली अहिलेसम्म सार्वजनिक नगरे पनि मतदातालाई आ–आप्mनो पक्षमा पार्न लागिपरेका छन् । यसैबीच, स्थानीय तह निर्वाचनका लागि छनोट भएका म्यादी प्रहरीको आदेखि पर्साको विभिन्न आठ स्थानमा तालिम सुरु भएको छ । पर्साको ठोरी, पटेर्वा, श्रीपुर, विर्ता, लङ्गडी, बहुअर्वाभाठा, पोखरिया र वीरगन्जस्थित जिल्ला प्रहरी कार्यालयमा म्यादी प्रहरीको तालिम सुरु गरिएको हो ।
जिल्ला प्रहरी कार्यालय पर्सामा दर्ता भएको तीन हजार एक सय २१ जना निवेदकमध्येबाट छनोटमा पर्न सफल एक हजार चार सय ९२ म्यादी प्रहरीलाई तालिममा सहभागी गराइएको जिल्ला प्रहरी कार्यालय पर्साले जनाएको छ । तालिममा एक हजार तीन सय ६७ पुरुष र एक सय २५ महिला सहभागी रहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रराज जोशीले जानकारी दिनुभयो । वैकल्पिक म्यादी प्रहरीका रूपमा पर्साका लागि दुई सय पुरुष र २४ महिला गरी कुल दुई सय २४ जनालाई राखिएको छ । पर्सा जिल्लाका स्थानीय तहका लागि एक सय ६३ वटा मतदान केन्द्र तोकिएका छन् । पर्साको एक उपमहानगरपालिका, एक नगरपालिका र ११ गाउँपालिकामा गरी कुल दुई लाख ८१ हजार ६ सय २० जना मतदाता रहेको निवार्चन कार्यालयले जनाएको छ ।
प्रकाशित मिति: शनिबार, चैत २६, २०७३
