–राजन राैनियार
२७ चैत, पर्सा । नेपाल सरकारले भूकम्पपीडितका लागि भारतबाट आयात गरेको करोडौँ रुपैयाँ मूल्यको जस्तापाता दुई वर्षदेखि वीरगन्जमा थन्किएको छ । सरकारको आदेशमा साल्ट्र ट्रेडिङ कर्पोरेसनले भारतबाट आयात गरेको रु २६ करोड मूल्य बराबरको जस्तापाता आपूर्ति मन्त्रालयको कारण वीरगन्जमा थन्किएको हो । जस्तापाता दुई वर्षदेखि नै वीरगञ्जको खाद्य संस्थानको खुल्ला चौरमा राखिएको छ । भूकम्पपीडितलाई वितरण गर्नका लागि साल्ट्र ट्रेडिङले २०७२ सालको साउनमा भारतबाट वीरगन्ज नाका हुँदै ५० हजार बन्डल जस्तापाता आयात गरेको वीरगन्ज भन्सार कार्यालयको तथ्यांकमा उल्लेख छ । सबै जस्तापाता खुल्ला चौरमै राखिएका कारण खिया लागेर बिग्रिने अवस्थामा छन । साल्ट्र ट्रेडिङ कर्पोरेसन वीरगन्जका प्रमुख अमोज लामिछानेले आपूर्ति मन्त्रालयको आपूर्ति तथा व्यापार विभागले कुनै पहलकदमी नलिदाँ जस्तापाता बितरण नभएको बताए । उनले सरकारकै निर्देशनमा आयात गरिएको जस्तापाता वीरगन्जको साल्ट ट्रेडिङ कर्पोरेसन परिसरमा ठाउँ नभएका कारण खाद्य संस्थान परिसरको खुल्ला चौरमा राखिएको बताए ।
प्रकाशित मिति: शनिबार, चैत २६, २०७३
