२४ चैत, कास्की । जंगली च्याउ खाँदा कास्कीको पोखरा लेखनाथ महानगरपालिकामा एकै परिवारका तीन जनाको मृत्यु भएको छ । पोखरा लामाचौरकी ६० वर्षकी माइली तामाङ, उनकी १९ वर्षकी छोरी मनमाया तामाङ र माइलीकी जेठी छोरीको कान्छा छोरा सोनम मगरको मृत्यु भएको प्रहरीले जनाएको छ । च्याउ खाएका सोनमका दाइ १२ वर्षका आयुष मगरको काठमाडौंको कान्ति बाल अस्पतालमा उपचार भइहरेको छ । गएको चैत १९ गते च्याउ खाएपछि झाडापखाला लाग्दा पनि अस्पताल नगई मेडिकलबाट औषधि खाएर घरै बसेकी माइली तामाङलाई मणिपाल शिक्षण अस्पताल, मनमायालाई गण्डकी मेडिकल कलेज र सोनमलाई चरक मेमोरियल अस्पतालमा भर्ना गरिएको थियो । उनीहरुको उपचारकै क्रममा मृत्यु भएको प्रहरीले जनाएको छ ।
प्रकाशित मिति: बुधबार, चैत २३, २०७३
